چین کا افغان شہریوں کو ویزے کے اجراء اور درآمدات کو ٹیکس فری کرنے کا اعلان

چین اور طالبان حکومت کے وزرائے خارجہ کی ملاقات تاشقند میں ہوئی، فوٹو: ٹوئٹر

---

BEIJING: چین کی وزارت خارجہ نے اعلان کیا ہے کہ یکم اگست سے افغان شہریوں کو ویزے کا اجراء دوبارہ شروع کر دیں گے جب کہ 98 فیصد افغان درآمدات کو ٹیکس فری کردیا جائے گا۔

عالمی خبر رساں ادارے کے مطابق چین کے وزیر خارجہ وانگ یی نے ازبکستان میں شنگھائی تعاون تنظیم کےوزرائے خارجہ کونسل کا اجلاس میں طالبان حکومت کے وزیر خارجہ ملا امیر متقی سے ملاقات کے دوران اپنی بھرپور حمایت کا یقین دلاتے ہوئے افغان عوام کے لیے چند اہم اقدامات سے آگاہ کیا۔

چین کے وزارت خارجہ کی جانب سے جاری بیان میں کہا گیا کہ وزیر خارجہ وانگ یی نے اپنے ہم منصب کو بتایا کہ پاک چین اقتصادی راہداری کو افغانستان تک توسیع دینے کی حمایت کرتے ہیں اور یکم اگست سے افغان شہریوں کو ویزے کی فراہمی بحال کردی جائے گی۔

چین کے وزیر خارجہ نے یہ بھی کہا کہ افغانستان کی 98 فیصد درآمدات کو بغیر ٹیکس کے ملک میں داخل ہونے کی اجازت ہوگی اور مزید ایسے اقدامات کیے جائیں گے جس سے جنگ زدہ ملک کے زیادہ سے زیادہ عوام کو فائدہ پہنچے۔

افغانستان کے لئے بڑی خبر،چین نے افغان مصنوعات پر تمام ٹیکس معاف کر دیئے، چین کے وزیر خارجہ کی اپنے ہم منصب افغان وزیر خارجہ امیر متقی سےملاقات میں اعلان، افغان شہریوں کے لئے یکم اگست سے ویزوں کے اجرا کا بھی فیصلہ، اب افغان تاجر چین کا دورہ کر سکیں گے جس سے دوطرفہ تجارت بڑھے گی pic.twitter.com/rk6W19cFrZ

— افغان اردو (@AfghanUrdu) July 29, 2022

وزیر خارجہ وانگ یی نے مغربی ممالک سے افغانستان پر عائد تجارتی اور اقتصادی پابندیوں کو اُٹھانے کا بھی مطالبہ کیا۔

تاحال چین سمیت کسی بھی ملک نے افغانستان میں طالبان کی حکومت کو تسلیم نہیں کیا ہے تاہم چند بھارت اور چین نے سفارتی دفاتر مقامی عملے کے ساتھ دوبارہ کھولنے کا عندیہ دیا ہے جب کہ دیگر ممالک نے حکومت کو تسلیم کرنے کے لیے خواتین کی تعلیم اور ملازمتوں سے دیگر مطالبات سے مشروط کیا ہے۔

واضح رہے کہ طالبان کے گزشتہ برس اقتدار سنبھالنے کے بعد سے افغانستان کے مرکزی بینک کے غیر ملکی ذخائر کو منجمد کردیا گیا ہے اور امریکا سمیت کئی ممالک نے امدادی رقوم بھی روک دی ہیں جس سے افغانستان کی معیشت تباہ ہوگئی ہے۔