2100 میگا ہرٹز ٹیلی کوم اسپیکٹرم کی نیلامی کی منظوری

نیلامی 10 سال کیلیے ہوگی، ہر 5 میگاہرٹز اسکیل کے عوض 96 ملین ڈالر حاصل ہوسکتے ہیں

Shahbaz Rana August 04, 2022

پہلیکسی آپریٹر نے 2100 میگا ہرٹز بینڈ میں دلچسپی نہیں لی، شرائط تبدیل کرنی پڑیں، وزیر خزانہ۔ فوٹو : فائل

ISLAMABAD: وفاقی حکومت نے 2100 میگاہرٹزبینڈ میں ٹیلی کوم اسپیکٹرم کی نیلامی کرنے کی منظوری دے دی، نیلامی 10 سال کے لیے ہوگی جس سے ہر 5 میگاہرٹز اسکیل کے عوض 96 ملین ڈالر حاصل ہوسکتے ہیں۔

وزارت خزانہ کی طرف سے جاری کردہ بیان کے مطابق اسپیکٹرم آکشن ایڈوائزری کمیٹی نے موجودہ کنسلٹنٹ کی رپورٹ کی بنیاد پر اتفاق رائے سے 2100 میگاہرٹزبینڈ کی 5، 5 میگاہرٹز بینڈوتھ میں 10 سال کے لیے نیلامی کا فیصلہ کیا ہے۔

سابقہ حکومت نے 5 میگاہرٹز بینڈ 15 سال کے لیے 29 ملین ڈالر فی ہرٹز کے نرخوں پر نیلام کیا تھا۔ ملک میں اس وقت مصروف عمل تینوں ٹیلی کام کمپنیوں نے بھی اپنے لائسنس کی 15 سال کی مدت ہی کی قیمت پر تجدید کرائی تھی۔

ایک ٹیلی کوم آپریٹر کے افسر کے مطابق آکشن اسپکٹرم کمیٹی صرف 2100 میگاہرٹزبینڈ کی10 سالہ مدت کے لیے نیلامی کررہی ہے جس سے ایک کمپنی کو ناجائز فائدہ حاصل ہوجائے گا۔

مذکورہ افسر کا کہنا تھا کہ یہ امتیازی اقدام ہے جس کے خلاف ٹیلی کوم آپریٹرز احتجاج بھی کرسکتے ہیں۔ تاہم آکشن ایڈوائزری کمیٹی کے چیئرمین اور وزیرخزانہ مفتاح اسماعیل کا نقطہ نظر مختلف ہے۔

مفتاح اسماعیل کا کہنا ہے کہ وفاقی حکومت نے 1800اور 2100 میگاہرٹز کے بینڈ نیلامی کے لیے پیش کیے تھے مگر کسی آپریٹر نے 2100 میگا ہرٹز بینڈ خریدنے میں دلچسپی نہیں لی، چنانچہ ہمارے پاس شرائط و ضوابط تبدیل کرنے کے سوا کوئی چارہ باقی نہیں بچا۔