بگ بیش لیگ کیلئے کھلاڑیوں کو این او سیز جاری

شاداب ڈرافٹ کی ٹاپ لسٹ میں شامل، سرفراز اور وہاب ریاض بھی دستیاب

Sports Desk August 23, 2022

ڈرافٹ میں 43 پاکستانی موجود،بابر،رضوان اور شاہین شریک نہیں ہوںگے۔ فوٹو: سوشل میڈیا

آسٹریلیا کی بگ بیش لیگ کیلئے پاکستان کرکٹ بورڈ (پی سی بی) نے تھوک کے حساب سے این او سی جاری کر دیے جبکہ شاداب خان ڈرافٹ کی ٹاپ لسٹ میں شامل ہوگئے۔

آسٹریلوی ٹی 20 لیگ بگ بیش کی جانب سے آنے والے سیزن کے پلیئرز ڈرافٹ سے قبل پلاٹینیم کیٹیگری کا اعلان کردیا گیا، جس میں دنیا کے نامور 12 ٹی 20 اسٹارز شامل ہیں، پاکستان کے شاداب خان بھی فہرست کا حصہ ہیں۔ ڈرافٹ کیلیے نامزد ہونے والے مزید 100 کھلاڑیوں کی تصدیق کردی گئی، مجموعی طور پر ڈرافٹ میں 279 کھلاڑیوں کے نام پیش ہوں گے جس میں سے بی بی ایل ٹیمیں اپنے اسکواڈز کو حتمی شکل دیں گی۔

پلاٹینیم کیٹیگری میں شاداب خان کے ساتھ جنوبی افریقی فاف ڈوپلیسی، انگلینڈ کے جیس روئے، لیام لیونگ اسٹن، سیم بلنگز، ڈیوڈ ویلی، کرس جورڈن، ویسٹ انڈین کیرون پولارڈ، آندرے رسل، ڈیوائن براوو، افغان راشد خان اور نیوزی لینڈ کے ٹرینٹ بولٹ شامل ہیں، شاداب، روئے، بلنگز، رسل، ویلی، جورڈن اور بولٹ پہلی بار بی پی ایل ڈرافٹ نامزدگی لسٹ میں سامنے آئے ہیں۔

مزید پڑھیں: بگ بیش لیگ کا شیڈول جاری، ایونٹ کا آغاز 13 دسمبر سے ہوگا

اتوار کے روز ہونے والے ڈرافٹ کے پہلے راؤنڈ میں پلاٹینیم کیٹیگری میں شامل کھلاڑیوں کی سلیکشن ہوگی، نامزد ہونے والے نئے کھلاڑیوں میں وہاب ریاض کے ساتھ کارلوس بریتھ ویٹ، ٹام کرن، جمی نیشم اور فل سالٹ بھی شامل ہیں،پاکستان کے 43 کھلاڑی ڈرافٹ لسٹ میں شامل ہیں، ان میں سرفراز احمد، محمد عامر، شان مسعود، شاہنواز دھانی، کامران اوران کے بھائی عمراکمل جیسے پلیئرز بھی موجود ہیں۔

پاکستان کرکٹ بورڈ کی جانب سے ڈرافٹ میں شریک تمام کھلاڑیوں کو این او سی بھی جاری کردیے گئے ہیں ، ڈرافٹ کے بعد کلبز غیر منتخب پلیئرز کی خدمات بطور متبادل بھی حاصل کرسکیں گے۔