اربوں کے ٹیکس فراڈ کے مقدمے میں نامزد اہم ملزم گرفتار

مقدمے میں 10 ملزمان نامزد،جعلی کمپنیوں کے ذریعے اربوں کی مبینہ منی لانڈرنگ کی گئی۔ فوٹو:فائل

---

انٹرنل آڈٹ ان لینڈ ریونیوایف بی آر کراچی میں درج مقدمے میں اہم پیش رفت سامنے آئی ہے۔

ذرائع نے بتایا کہ اربوں کے ٹیکس فراڈ کے مقدمے میں نامزد اہم ملزم مرزا ایازعلی بیگ کو ایف بی آر حکام نے گرفتار کرلیا ہے۔ ذرائع نے بتایا کہ گرفتار ملزم کوالٹی انٹرنیشنل نامی کمپنی کا مالک ہے جسے صدر کراچی سے گرفتار کیا گیا۔

مرزا ایاز علی بیگ کو تمنا انڈسٹریز کیس میں درج مقدمے میں گرفتار کیا گیا۔ ذرائع نے بتایا کہ ملزم کے بینک اکائونٹ میں سینچری انجینئرنگ انڈسٹریز کے بینک اکاؤنٹس سے بھاری رقوم کی منتقلیوں کی نشاندہی ہوئی تھی۔

ایف بی آر حکام کا کہنا ہے کہ مقامی بیٹری ساز ادارے سینچری انجئینرنگ کے مالک جاوید اقبال صدیقی مقدمے کے مرکزی ملزمان میں شامل ہیں۔ مقدمے میں 10 ملزمان نامزد ہیں جن میں سے ایک ملزم کو گرفتار کیا گیا ہے۔

ذرائع نے بتایا کہ نواب زمان نامی معذور گرفتار ملزم کے علم میں لائے بغیر مرکزی ملزمان نے ایک کمپنی بنا کر فراڈ کیا اور اب تک کی جانے والی تحقیقات کے مطابق مختلف جعلی کمپنیوں کے ذریعے اربوں کی مبینہ منی لانڈرنگ بھی کی گئی ہے۔