پولیس نے گینگ وار کارندوں سمیت 6 ملزم گرفتار کرلیے

الیاس گوٹھ میں گینگ وار کے ملزم راشد کو زخمی حالت میں گرفتار کرکے اس کے قبضے سے اسلحہ برآمد کرنیکا دعویٰ ۔ فوٹو: فائل

---

رینجرز اور پولیس نے لیاری گینگ وار کے 4 ملزمان سمیت 6 ملزمان کو گرفتار کر کے اسلحہ ، دستی بم اور واکی ٹاکی برآمد کر لیا،رینجرز کی بھاری نفری نے لیاقت آباد کے علاقے الیاس گوٹھ میں ٹارگٹڈ آپریشن کے دوران فائرنگ کے تبادلے کے بعد گینگ وار کے ملزم 22 سالہ راشد ولد عبدالرحیم کو زخمی حالت میں گرفتار کرکے اس کے قبضے سے اسلحہ برآمد کرنیکا دعویٰ کیا ہے۔

رینجرز ترجمان کے مطابق زخمی ملزم کے دیگر ساتھی گھیرا تنگ ہونے کے باوجود فائرنگ کرتے ہوئے فرار ہوگئے ، اطلاعات کے مطابق رینجرز نے لیاری کے علاقے موسیٰ لائن میں کارروائی کرتے ہوئے کالعدم پیپلز امن کمیٹی عذیر بلوچ گروپ کے کمانڈر شیراز کامریڈ کے 3 کارندوں کو حراست میں لے کر ان کے قبضے سے 2سب مشین گنز ،4 ٹی ٹی پستول ، دستی بم اور واکی ٹاکی برآمد کر لیے، گارڈن پولیس نے دھوبی گھاٹ کے قریب کارروائی کرتے ہوئے گھروں میں ڈکیتیاں کرنیوالے ملزم محمد صابر ولد محمد رفیق کو گرفتار کرکے اس کے قبضے سے اسلحہ برآمد کرلیا پولیس کے مطابق ملزم نے دوران تفتیش ڈیفنس ، کلفٹن ، درخشاں ، ناظم آباد ، زمان ٹائون، نارتھ کراچی میں متعدد وارداتیں کرنے کا انکشاف کیا ہے ، سعید آباد پولیس نے روٹ نمبر 7-C بس اسٹاپ کے قریب کارروائی کرتے ہوئے مقابلے کے بعد لینڈ مافیا سے تعلق رکھنے والے متعدد وارداتوں میں مطلوب ملزم42سالہ عیسیٰ گل ولد احمد جان کو زخمی حالت میں گرفتار کرلیا جبکہ اس کا ساتھی موقع سے فرار ہوگیا۔ علاوہ ازیں گذری پولیس نے ڈیفنس فیز 4میں قائم آئیڈیل بیکری میں لوٹ مار کرنے والے 2 ملزمان افتخار اور علی نواز کو گرفتار کرکے اسلحہ برآمد کرلیا ۔