2 ازبک لڑکیاں فرار کیس کا مرکزی ملزم کار ڈیلر نکلا

مصطفی نے لڑکیوں کی بغیر امیگریشن کلیئرنس کیلیے ایئرپورٹ پر حساس ادارے کا اہلکار ظاہر کیا

یعقوب ملک March 17, 2014

لڑکیاں جلد گرفتار کرلینگے، اسسٹنٹ ڈائریکٹرایف آئی اے، بااثرشخصیت کے ہاں مقیم ہیں،ذرائع۔ فوٹو: فائل

ISLAMABAD: اسلام آباد ایئر پورٹ سے ازبکستان کی2لڑکیوں کوبغیرامیگریشن نکالنے کے کیس میں ملوث مرکزی ملزم مصطفی منیرملک تحقیقات میں ایک کارڈیلرنکلا ہے۔

ایف آئی اے ذرائع نے بتایاایف آئی اے کی تحقیقاتی ٹیم نے ملزم مصطفیٰ منیرملک کوگزشتہ جمعے کو عدالت سے عبوری ضمانت منسوخ ہونے کے بعد گرفتار کیا تھا۔ اسسٹنٹ ڈائریکٹربابرخان کی قیادت میں تحقیقاتی ٹیم کی ابتدائی تفتیش کے دوران ملزم نے اعتراف کیاوہ دونوں غیرملکی لڑکیوں کو لینے کیلیے اویس بہرام بلوچ کے ساتھ ہوائی اڈے پر گیا تھااوراس نے اس مقصد کیلیے ایک ملزم آصف کو 5لاکھ روپے دیے تھے جن میں سے ایک لاکھ روپے ایئرپورٹ پر ایف آئی اے کے کانسٹیبل شہزادکورشوت کے طور پردیے جبکہ 30جنوری کو تعینات امیگریشن حکام کی رضامندی سے بغیرامیگریشن دونوں لڑکیوں کوکلیئرکرانے میں سہولت دینے کی غرض سے اویس بہرام کو30ہزارروپے دیے۔

ملزم مصطفی ایک کارڈیلربھی نکلا ہے،اس نے دونوں لڑکیوں کوکلیئرکرانے کی کوشش میں ایئرپورٹ پہنچنے پر امیگریشن حکام کوایک حساس ادارے کے اہلکارکے طور پرپیش کیا،ان لڑکیوں کے بارے میں خیال ہے کہ وہ اسلام آبادمیں ایک بااثرخاتون کیساتھ موجودہیں۔ اسسٹنٹ ڈائریکٹر ایف آئی اے پاسپورٹ سیل بابرخان نے رابطہ کرنے پرملزم مصطفی کے انکشافات کی تصدیق کرتے ہوئے کہاکہ عبوری ضمانت کے عرصے میں اس نے غیرملکی لڑکیوں کو فرارکرانے کے کیس میں ملوث ہونے سے مکمل لاتعلقی ظاہرکی اورملزم ایک کارڈیلرتھا اوراپنے غیرقانونی کاموں کیلیے سرکاری حکام اور دوسرے لوگوںکی آنکھوں میں دھول جونکھنے کیلیے اپنے آپ کو حساس ادارے کے اہلکارکے طورپر پیش کیا۔واضح رہے دونوں ازبک لڑکیاں تاحال فرارہیں اورایف آئی اے ٹیموں کے مسلسل چھاپوں کے باجودگرفتارنہیں ہوسکیں۔ذرائع نے بتایاہے کہ دونوں غیرملکی لڑکیوں نے کسی بااثرشخصیت کے ہاںغیرقانونی طورپرپناہ لے رکھی ہے۔