اے ڈی بی نے سیلاب متاثرین کی امداد کیلیے 30 لاکھ ڈالر امداد کی منظوری دیدی

خوراک کے سامان، خیموں اور دیگر امدادی سامان کی خریداری کیلیے فنڈ فراہم کیا جائے گا

Irshad Ansari August 31, 2022

مشکل کی گھڑی میں پاکستان کے ساتھ کھڑے ہیں، ڈائریکٹر جنرل اے ڈی بی۔ (فوٹو : فائل)

ایشیائی ترقیاتی بینک (اے ڈی بی) نے پاکستان میں سیلاب متاثرین کی امداد کے لیے 30 لاکھ ڈالر امداد کی منظوری دے دی ہے۔

سماجی رابطے کی ویب سائٹ ٹویٹر پر ایشیائی ترقیاتی بینک کی طرف سے جاری کردہ پیغام میں بتایا گیا ہے کہ ایشیا پیسیفک ڈیزاسٹر ریسپانس فنڈ (اے پی ڈی آر ایف) سے مالی اعانت فراہم کی جانے والی یہ گرانٹ سیلاب زدگان کی امداد کے لیے خوراک کے سامان، خیموں اور دیگر امدادی سامان کی خریداری کے لیے فنڈ فراہم کرے گی۔

ایشیا پیسیفک ڈیزاسٹر ریسپانس فنڈ ایک خصوصی فنڈ ہے جو قدرتی خطرات سے پیدا ہونے والی آفات سے متاثرہ اے ڈی بی کے ترقی پذیر رکن ممالک کو تیزی سے گرانٹ دینے کے لیے بنایا گیا ہے۔

#ADBNews: ADB has approved a $3 million grant to support the Government of Pakistan’s emergency flood relief efforts.

The grant will help fund the purchase of relief items to support flood victims across the country: https://t.co/Mkfo53ctui pic.twitter.com/QsqTDAH5jW
— Asian Development Bank (@ADB_HQ) August 31, 2022

اے ڈی بی کے ڈائریکٹر جنرل برائے وسطیٰ اور مغربی ایشیا یوگینی زوکوف نے کہا کہ مشکل کی گھڑی میں پاکستان کے ساتھ کھڑے ہیں، ہم اس قدرتی آفت کے تباہ کن اثرات پر قابو پانے اور متاثرہ خاندانوں کو فوری امداد فراہم کرنے میں پاکستان کی مدد کرنے کے لیے حکومت اور دیگر ترقیاتی شراکت داروں کے ساتھ کام کرنے کے لیے پرعزم ہیں۔

پاکستان کے لیے اے ڈی بی کے کنٹری ڈائریکٹر یونگ یی نے کہا کہ ہماری ٹیم طویل مدتی بحالی کی کوششوں میں مدد کرنے اور سیلاب سے ہونے والے نقصان کا اندازہ لگانے میں بھی مدد کر رہی ہے۔