متنازع ٹوئٹس پر گرفتار کمال راشد خان سینے میں تکلیف کے باعث اسپتال منتقل

متنازع ٹوئٹس پر ممبئی پولیس کی حراست میں موجود ناقد اور اداکار کمال راشد خان کو سینے میں تکلیف کے باعث اسپتال منتقل کردیا گیا ہے۔

بھارتی میڈیا رپورٹس کے مطابق ادارکار راشد خان کو گزشتہ روز پولیس نے ممبئی ائیر پورٹ سے گرفتار کیا تھا، تاہم اس دوران سینے میں تکلیف کی شکایت پر انہیں اسپتال منتقل کردیا گیا ہے۔

واضح رہے کے کمال راشد خان کے خلاف مقامی تنظیم 'یووا سینا' کی کور کمیٹی نے ممبئی کے ملاڈ پولیس اسٹیشن میں ایف آئی آر درج کرائی تھی جس میں الزام لگایا کہ کمال نے اداکار عرفان خان اور رشی کپور کے بارے میں قابل اعتراض ٹویٹس کی ہیں، جس کے بعد اداکار کے خلاف یہ کارروائی کی گئی۔

کمال خان نے اسٹار کرکٹر ویرات کوہلی کی بگڑتی دماغی حالت(ڈپریشن) کا ذمہ دار ان کی بیوی اداکارہ انوشکا شرما کو قرار دیا تھا جس پر انہیں شدید تنقید کا سامنا کرنا پڑا۔

دوسری جانب خواتین کے قومی کمیشن نے بھی پولیس سے کمال راشد خان کے خلاف خواتین سے متعلق نازیبا گفتگو کرنے کا مقدمہ بنانے کی درخواست کی ہے۔