سندھ حکومت میں شمولیت کیلئے ایم کیوایم اور پیپلزپارٹی کے معاملات طے پاگئے

دونوں جماعتوں کے درمیان حتمی طور پر معاملات طے کرنے کے لئے گورنر ہاؤس کراچی میں آئندہ ایک دو روز اجلاس ہوگا۔ فو ٹو: فائل

---

سندھ حکومت میں شمولیت کے لئے پیپلز پارٹی اور متحدہ قومی موومنٹ کے درمیان گزشتہ کئی ماہ سے جاری مذاکرات طے پاگئے ہیں جس کے تحت ایم کیو ایم کو 5 وزارتیں دی جائیں گی۔

ایکسرپریس نیوز کے مطابق دبئی اور لندن میں دونوں جماعتوں کے قائدین کے درمیان ہونے والی ملاقاتوں میں ایم کیو ایم کی سندھ حکومت میں شمولیت کے حوالے سے تمام معاملات طے پاگئے ہیں جس کے تحت متحدہ قومی موومنٹ کو 5 وزارتیں ملیں گی جبکہ 2 مشیر بھی مقرر کئے جائیں گے جن کے اختیارات اور عہدے صوبائی وزیر ہی کے برابر ہوں گے، ایم کیو ایم کو انفارمیشن ٹیکنالوجی، صنعت، اوقاف اور صحت کی وزارتیں ملیں گی جبکہ بلدیات، خزانہ، منصوبہ بندی اور داخلہ امور میں سے کوئی ایک وزارت ایم کیو ایم کو ملے گی۔

دونوں جماعتوں کے درمیان حتمی طور پر معاملات طے کرنے کے لئے گورنر ہاؤس کراچی میں آئندہ ایک دو روز اجلاس ہوگا جس میں ایم کیو ایم کی جانب سے ڈاکٹر خالد مقبول صدیقی، فاروق ستار، بابر غوری اور ڈاکٹر صغیر احمد شریک ہوں گے جبکہ پیپلز پارٹی کی جانب سے وزیر اعلیٰ سندھ قائم علی شاہ، نثار کھوڑو اور شرجیل میمن شریک ہوں گے جس کے بعد ایم کیو ایم کی جانب سے صوبائی حکومت میں باضابطہ طور پر شمولیت کا اعلان کردیا جائے گا۔

واضح رہے کہ گزشتہ برس سندھ حکومت میں شمولیت کے حوالے سے ایم کیو ایم نے اپنے کارکنوں میں ریفرنڈم بھی منعقد کرایا تھا تاہم کارکنوں کی ہلاکت کے بعد اس سلسلے میں کوئی اعلان نہیں ہوسکا تھا۔