سلمان خان نے بگ باس میں عدنان صدیقی کے شو کا فارمیٹ کاپی کیا
عدنان صدیقی کے دعوے پر صارفین نے تنقید کی جبکہ کچھ نے اسے بات کو درست بھی قرار دیا
پاکستانی اداکار عدنان صدیقی نے ایک تصویر شیئر کر کے اشارہ دیا ہے کہ بالی ووڈ کے سلطان سلمان خان نے بگ باس میں اُن کے پروگرام تماشا کا فارمیٹ کاپی کیا ہے۔
سماجی رابطے کی سائٹ انسٹاگرام پر عدنان صدیقی نے ایک صارف کی بنائی گئی تصویر شیئر کی جس میں حال ہی میں پاکستانی نجی ٹی وی چینل پر نشر ہونے والے ریئلٹی شو 'تماشا' اور سلمان خان کے بگ باس شو کی تصویر کولاج کی صورت میں تھی۔
تصویر کے ساتھ دعویٰ کیا گیا کہ سلمان خان نے پہلی بار بگ باس ہاؤس میں شرکا کے ساتھ کھانا کھایا اور ویک اینڈ وار کی میزبانی کی، جیسے عدنان صدیقی نے اپنے شو تماشا میں کی تھی۔
عدنان صدیقی نے اس تصویر کو شیئر کرتے ہوئے لکھا کہ 'میرے ناقدین اور دوستوں میں نے اپنا مقدمہ آپ کے سامنے رکھ دیا ہے'۔ اس کے ساتھ ہی انہوں نے غمزدہ ایموجی بنا کر تماشا کا ہیش ٹیگ بھی استعمال کیا۔
اس پوسٹ پر صارفین نے عدنان صدیقی کو جواب دیے اور کہا کہ 'آپ کا دعویٰ مضحکہ خیز ہے کیونکہ آپ نے پورا شو بگ باس کا چوری کیا ہے'۔
جبکہ کچھ صارفین ایسے بھی تھے جنہوں نے عدنان صدیقی کو مبارک باد تھی اور اُن کی صلاحیتوں کی تعریف بھی کی۔