ایمنسٹی کا ایران میں شہریوں کیخلاف خونریز کریک ڈاؤن کی تحقیقات کا مطالبہ

ایرانی افواج نے بچی سے پولیس افسر کی جنسی زیادتی کے واقعے کیخلاف احتجاج کرنے والے لوگوں پر گولیاں چلائیں

---

ایمنسٹی انٹرنیشنل نے ایران کے شہر زاہدان میں پاسداران انقلاب اور سیکیورٹی فورسز کی جانب سے نمازیوں اور عام شہریوں کیخلاف کریک ڈاؤن کی شدید مذمت کی ہے۔

انسانی حقوق کی تنظیم ایمنسٹی انٹرنیشنل نے بیان میں کہا کہ صوبہ سیستان بلوچستان کے شہر زاہدان میں نماز جمعہ کے بعد ایرانی سیکیورٹی فورسز نے بلوچ مظاہرین کیخلاف آپریشن کیا جس میں بچوں سمیت 80 افراد جاں بحق ہوئے۔

مسلح اہلکاروں نے شہریوں پر فائرنگ اور شیلنگ کی جس کے نتیجے میں سیکڑوں افراد زخمی ہوئے۔ عینی شاہدین کے مطابق ہلاکتوں کی تعداد اس سے کہیں زیادہ ہے، بیشتر لوگوں کو سینے، سر اور گردن میں گولیاں ماری گئیں۔

ایمنسٹی نے اسے خونریز جمعہ قرار دیتے ہوئے کہا کہ ایران میں لڑکی مھسا امینی کی ہلاکت پر تین ہفتے سے حکومت کے خلاف جاری حالیہ احتجاجی کی لہر میں یہ خونریز ترین دن تھا۔

یہ بھی پڑھیں: ایرانی شہر زاہدان میں ہنگامے؛ 5 اہلکاروں سمیت41 افراد ہلاک

ایمنسٹی کی سیکرٹری جنرل ایجنس کولامارڈ نے کہا کہ ایرانی حکومت نے انسانی جان کی حرمت کو بری طرح پامال کردیا اور ثابت کیا کہ وہ اپنا اقتدار بچانے کے لیے کسی بھی حد تک جاسکتی ہے۔

انہوں نے کہا کہ نومبر 2019 میں ہونے والے مظاہروں جن میں سیکڑوں افراد جاں بحق ہوگئے تھے، اس کے تین سال بعد بھی ایرانی حکومت شہریوں کیخلاف طاقت کا بے رحمانہ استعمال کر رہی ہے۔ ایمنسٹی انٹرنیشنل نے اقوام متحدہ پر زور دیا کہ ایران میں ہونے والے سنگین جرائم کی آزادانہ تحقیقات کرائی جائیں اور ملوث افراد کو قرار واقعی سزا دی جائے۔

Iran's security forces have killed at least 82 Baluchi protesters and bystanders in Zahedan, Sistan & Baluchistan province. Those killed include 3 children. "Bloody Friday", 30 September, marked the deadliest day on record since protests began 3 weeks ago https://t.co/QWoYhpwgk0 pic.twitter.com/w3bhdpT5M3

— Amnesty Iran (@AmnestyIran) October 6, 2022

ایمنسٹی نے بتایا کہ ایران کی اعلیٰ فوجی قیادت نے پولیس سمیت تمام سیکیورٹی فورسز کو حکومت مخالف مظاہرین کو کچلنے کےلیے طاقت کے استعمال کی کھلی چھوٹ دی ہے۔

واضح رہے کہ ایرانی پولیس افسر کی جانب سے 15 سالہ بچی سے جنسی زیادتی کیخلاف زاہدان سمیت ملک بھر میں نماز جمعہ کے بعد احتجاج ہوا تھا جس پر ایرانی فورسز نے گولی چلائی تھی۔