نعتِ رسول مقبول ﷺ

ایمان لانے والے دلوں میں رہے مکیں
اے صادق و امیں
احسان مند آپ کا ہر کوئی ، ہر کہیں
اے صادق و امیں

توصیف کی ہے آپ کی اللہ نے بیاں
پڑھ لیجیے قرآں
رَطب اللسان آپ کے ، افلاک اور زمیں
اے صادق و امیں

دنیائے آب و گِل کو کہا آپ نے سرائے
کیا کوئی دل لگائے
شاہوں کے شاہ ہو کے رہے بوریا نشیں
اے صادق و امیں

برسوں مقاطعے کی اذیت بھی دی گئی

طائف میں کافروں کی تھیں ایذا رسانیاں
پاؤں لہولہاں
پھر بھی دعائے خیر ہی کی ، بددعا نہیں
اے صادق و امیں

پائی فلاح، آپ کی تقلید جس نے کی
تائید جس نے کی
وہ کامراں ہوا ، تھا جسے آپ پر یقیں
اے صادق و امیں

اللہ کی پکڑ ہے بہت سخت اے فصیح
بے شک ہے یہ صحیح
رسوا رہیں گے آپ کے بدخواہ و نکتہ چیں
اے صادق و امیں