کراچی میں سمندری ہوائیں بند رہنے کی پیش گوئی

فوٹو فائل

---

محکمہ موسمیات نے سمندری ہوائیں بند رہنے کی پیش گوئی کرتے ہوئے کہا ہے کہ شہر میں گرمی کی حالیہ جزوی لہر مزید کئی روز برقرار رہے گی۔

محکمہ موسمیات کے مطابق بدھ کو شہر کا موسم گرم وخشک رہا،سمندری ہوائیں بند رہیں جبکہ بلوچستان کی سمت سے ہوائیں چلیں، زیادہ سے ذیادہ درجہ حرارت 36.5 ڈگری اور نمی کا تناسب صرف 19 فیصد رہا۔

میٹ آفس کا کہنا ہے کہ ہوا میں نمی کا تناسب کم ہونے کی وجہ سے گرمی کی شدت بہت زیادہ محسوس نہیں کی گئی،ارلی وارننگ سینٹر کے مطابق شہر میں گرم و خشک موسم اگلے کئی روز تک بدستور برقرار رہے گا،دوپہر کے وقت سمندری ہوائیں مکمل طور پر بند رہیں گی،اس دوران بلوچستان کی گرم ریگستانی ہوائیں چلنے کا امکان ہے۔

محکمہ موسمیات کے مطابق دوپہر کے وقت معطل سمندری ہوائیں شام کو فعال ہونے کی توقع ہے،جمعرات کوزیادہ سے زیادہ درجہ حرارت 35 سے 37 ڈگری جبکہ جمعے کو پارہ 36 سے38 ڈگری کے درمیان رہنے کا امکان ہے،صوبے بھر میں بھی موسم گرم اور خشک ریکارڈ ہوسکتا ہے۔