کراچی مسجد کے اندر سے مؤذن کی پھندا لگی لاش برآمد

متوفی مسجد کے احاطے ہی میں رہائش پذیر تھا (فوٹو فائل)

---

گارڈن کے علاقے فوارہ چوک کے قریب واقع محمدی مسجد کے اندر سے مؤذن کی گلے میں رسی کا پھندا برآمد ہوئی۔

پولیس کے مطابق متوفی کی شناخت 55 سالہ گلستان کے نام سے ہوئی، جو مسجد کا مؤذن اور مسجد کے احاطے ہی میں رہائش پذیر تھا۔ ابتدائی طور پر واقعہ خودکشی بتایا جا رہا ہے تاہم فوری طور پر اس کی وجہ معلوم نہیں ہوسکی۔

علاوہ ازیں نارتھ کراچی خواجہ اجمیر نگری تھانے کے قریب گھر کے زیر زمین پانی کے ٹینک میں کمسن بچہ گر گیا جسے فوری طور پر ٹینک سے نکال کر اسپتال منتقل کیا گیا، جہاں ڈاکٹروں نے بچے کی موت کی تصدیق کردی۔ متوفی 6 سالہ رضا گھر کے صحن میں کھیلتے ہوئے پانی کے زیر زمین ٹینک میں ڈوب گیا تھا۔ اہل خانہ بغیرپولیس کارروائی کے لاش اپنے ہمراہ لے گئے۔

دریں اثنا اورنگی ٹاؤن کے علاقے پونے پانچ نمبر چورنگی پر بلال مسجد کے قریب نالے سے 50 سالہ نامعلوم شخص کی لاش ملی، جو ڈوب کر ہلاک ہوگیا ۔ریسکیو ذرائع کے مطابق لاش 3 دن پرانی ہے، جس کی فوری طور پر شناخت نہیں ہو سکی ۔