کم عمر بچہ ٹریفک پولیس کی موٹر سائیکل دوڑاتا رہا ویڈیو وائرل

کراچی کی سڑکوں پر کم عمر بچے کی ٹریفک پولیس کی موٹرسائیکل سواری کی ویڈیو سوشل میڈیا پروائرل ہوگئی۔

کراچی کی مرکزی شارع فیصل پر ٹریفک پولیس کی موٹرسائیکل کم عمر بچہ دوڑاتا رہا۔ بچہ ٹریفک پولیس کی موٹرسائیکل چلانے کے دوران بار بارہوٹر بھی بجاتا رہا ۔ قریب سے گزرتے شہریوں نے بچے کی سرکاری موٹرسائیکل چلانے کی ویڈیو بنا کر سوشل میڈیا پر ڈال دی جو وائرل ہوگئی۔


ویڈیو میں دیکھا جا سکتا ہے کہ شارع فیصل پر نرسری سے ایئرپورٹ کی جانب جانے والے فلائی اوور پر ٹریفک پولیس کے افسر کی سرکاری موٹر سائیکل ایک کم عمر بچہ چلارہا ہے۔ موٹر سائیکل پر سرکاری کلر ، سرکاری ہوٹر ، فرنٹ پر شیشہ ، پچھلے حصے پر باکس اور دیگر چیزیں بھی نصب ہیں جبکہ انگریزی میں '' ٹریفک پولیس '' بھی نمایاں طور پر لکھا ہوا ہے۔

ڈی آئی جی ٹریفک احمد نواز چیمہ سے رابطہ کیا گیا تو انھوں نے بتایا کہ مذکورہ موٹر سائیکل آئی آئی چندریگر روڈ پر قائم ٹریفک سیکشن میں الاٹ کی گئی ہے۔ موٹرسائیکل دو دن سے خراب تھی اور مرمت کی غرض سے مکینک کے پاس تھی۔ موٹر سائیکل چلانے والا مکینک کا بیٹا ہے جس کے خلاف قانونی کارروائی کی جائے گی۔