اسلام آباد میں ڈینگی سے ایک اور شخص زندگی کی بازی ہار گیا

اسلام آباد میں ڈینگی سے ایک اور شخص زندگی کی بازی ہار گیا جس کے بعد رواں سیزن میں جاں بحق افراد کی تعداد 8 ہوگئی۔

ڈسڑکٹ ہیلتھ آفیسر کا کہنا ہے کہ گزشتہ 24 گھنٹوں میں ڈینگی سے مزید 103 افراد متاثر ہوئے، متاثرہ مریضوں کی مجموعی تعداد 3ہزار 724 تک پہنچ گئی۔ دیہی علاقوں میں 60 جبکہ شہری علاقوں سے 43 مریض سامنے آئے۔

ڈی ایچ او کا کہنا ہے کہ ڈینگی سے اب تک دیہی علاقوں میں 6 جبکہ شہری علاقوں سے 2 افراد کی موت واقع ہوئی۔

راولپنڈی


راولپنڈی میں 24 گھنٹوں کے دوران 100فراد ڈینگی کا نشانہ بنے، اب تک ڈینگی سے زندگی کی بازی ہارنے والوں کی تعداد 4 ہوگئی جبکہ ڈینگی کا نشانہ بننے والوں کی ابتک تعداد 3708ہوچکی ہے۔

شہر کے تین اسپتالوں میں زیر علاج مریضوں کی تعداد 221ہوگئی جبکہ اسلام آباد کے علاقوں سے ڈینگی کے 44مریض راولپنڈی کے اسپتالوں میں زیر علاج ہیں۔

تین اسپتالوں کے 404بیڈز پر 221مریض زیر علاج ہیں۔ بے نظیر بھٹو جنرل اسپتال میں 74مریض داخل ہیں، ہولی فیملی میں 88 اور ڈسٹرکٹ ہیڈ کوارٹر اسپتال میں 59مریض زیر علاج ہیں، اسپتالوں میں ڈینگی کے پازٹیو مریض 130ہوگئے۔

شہر و کینٹ میں انسداد ڈینگی مہم میں تیزی لائی گئی ہے، کیس رسپانس کے تحت مریضوں کے علاقوں میں فوگنگ سپرے کیا جا رہا ہے۔