اسلام آباد میں اوباش نوجوان کی فائرنگ سے بچہ جاں بحق
انیق نامی ملزم فائرنگ کر کے فرار ہوگیا، گرفتاری کے لیے چھاپے مارے جارہے ہیں، پولیس
وفاقی دارالحکومت کے سیکٹر جی سیون میں اوباش نوجوان کی فائرنگ سے ایک بچہ جاں بحق جبکہ دوسرا زخمی ہوگیا۔
ایکسپریس نیوز کے مطابق اسلام آباد کے تھانہ آبپارہ کے علاقے سیکٹر جی سیون میں انیق نامی اوباش نوجوان کی فائرنگ سے دو بچے زخمی ہوئے جس کے بعد ملزم وہاں سے فرار ہوگیا۔
عینی شاہدین نے واقعے سے متعلق پولیس کو آگاہ کیا اور دونوں زخمیوں کو اسپتال منتقل کیا جہاں ایک بچہ زخموں کی تاب نہ لاتے ہوئے دم توڑ گیا۔ پولیس حکام کے مطابق جاں بحق ہونے والے بچے کی شناخت علی کے نام سے ہوئی جس کی لاش کو ضابطے کی کارروائی کے بعد لواحقین کے حوالے کیا گیا۔
سی سی ٹی وی کیمرے کی مدد سے حاصل ہونے والی معلامات کی بنیاد پر پولیس نے بتایا کہ ملزم اس سے پہلے بھی فائرنگ کے واقعات میں ملوث رہا اور مفرور ہے۔
پولیس نے ملزم کی شناخت کے بعد ملزم کی گرفتاری کے لیے چھاپے مارنے شروع کردیے ہیں۔