بیرون ملک جانیوالے مسافروں سے بھاری مقدار میں منشیات برآمد

اینٹی نارکوٹکس فورس نے بیرون ملک جانے والے مسافروں سے بھاری مقدار میں منشیات برآمد کرکے اسمگلنگ کی کوشش ناکام بنادی۔


ایکسپریس نیوز کے مطابق اے این ایف اور اے ایس ایف کی باچا خان انٹرنیشنل ائرپورٹ پر مشترکہ کارروائیوں میں شارجہ جانے والے بنوں کے رہائشی ملزم سے 9300 نشہ آور گولیاں برآمد ہوئیں جب کہ دوسری کارروائی میں دوحا جانے والے خیبر کے رہائشی ملزم کے ٹرالی بیگ سے ایک کلو 521 گرام آئس برآمد ہوئی۔

علاوہ ازیں اے این ایف اور ایف سی کی مشترکہ کارروائی کے دوران اورکزئی سے پلاسٹک کے تھیلوں سے 20 کلو چرس برآمد ہوئی۔ دوسری جانب حیدر آباد میں کارروائی کرتے ہوئے 2 ملزمان سے 6 کلو چرس برآمد کرلی گئی۔ ملزمان کے خلاف انسدادِ منشیات ایکٹ کے تحت مقدمات درج کر کے مزید تحقیقات کا آغاز کر دیا گیا ہے۔