آئی جی اسلام آباد کا سڑکیں بند کرنے والوں کے خلاف سخت کارروائی کا حکم

اسلام آباد میں سیکیورٹی ہائی الرٹ، اسلام آباد ایکسپریس وے اور سرنگر ہائی سمیت شہر بھر میں پولیس کی بھاری نفری تعینات

ویب ڈیسک October 21, 2022

جو مظاہرین سڑک بلاک کرے اس سے ہرگز نرمی نہ برتی جائے، آئی جی اسلام آباد (فوٹو : فائل)

آئی جی اسلام آباد نے پی ٹی آئی کے احتجاج پر آپریشنل شعبے کی تمام نفری کو سڑکوں پر آنے اور سڑکیں بند کرنے والوں کے خلاف کارروائی کا حکم دے دیا۔

ایکسپریس نیوز کے مطابق آئی جی نے حکم دیا ہے کہ نہ صرف ایس ایچ اوز اور ایس ڈی پی اوز بلکہ زونل ایس پیز، ایس ایس پی آپریشن اور ڈی آئی جی خود پٹرولنگ کی مانیٹرنگ کریں، ڈائریکٹر سیف سٹی شہر بھر کی موثر مانیٹرنگ کرکے آپریشنل پولیس افسران سے لمحہ بہ لمحہ رابطے میں رہیں۔

ذرائع کے مطابق آنسو گیس کے شیل فیض آباد، ایکسپریس ہائی وے، مری روڈ، بے نظیر چوک، گولڑہ موڑ، سترہ میل کے اہم داخلی و خارجی راستوں پر تعینات پولیس نفری کو فراہم کردئیے گئے۔

یہ پڑھیں : پی ٹی آئی کا ملک بھر میں احتجاج، پنجاب میں متعد سڑکیں بند

ذرائع کے مطابق آئی جی نے حکم دیا ہے کہ جس علاقے میں امن عامہ میں خلل پڑا یا شاہراہیں بلاک ہوئیں متعلقہ افسران سے باز پرس ہوگی، کیمروں کے ذریعے مانیٹرنگ کرکے امن تباہ کرنے والوں کو فوری حراست میں لیا جائے، قانون کو ہاتھ میں لینے اور املاک کو نقصان پہنچانے والوں سے زیرو ٹالیرنس کے تحت نمٹا جائے۔

ذرائع کے مطابق اسپیشل برانچ نے آئی جی کو رپورٹ دی ہے کہ پی ٹی آئی کی جانب سے اسلام آباد راولپنڈی کی سڑکیں بلاک کی جارہی ہیں جس پر پولیس نے مظاہرین کے خلاف کارروائی کی تیاری شروع کردی۔

ذرائع نے بتایا ہے کہ آئی جی نے حکم دیا ہے کہ جو مظاہرین سڑک بلاک نہ کریں اور پُرامن رہیں انہیں نہ روکا جائے لیکن جو سڑک بلاک کرے اس سے ہرگز نرمی نہ برتی جائے۔

اسلام آباد میں سڑکوں پر پولیس کی بھاری نفری تعینات

پی ٹی آئی کے احتجاج پر اسلام آباد میں سیکیورٹی ہائی الرٹ کر دی گئی، ڈپٹی کمشنر اسلام آباد ، ڈی آئی جی آپریشن، اسلام آباد انتظامہ اور پولیس کے اعلی افسران فیلڈ گشت پر نکل آئے۔ اسلام آباد ایکسپریس وے اور سرنگر ہائی سمیت شہر بھر میں پولیس کی بھاری نفری تعینات کردی گئی۔

دریں اثنا ڈپٹی کمشنر اسلام آباد عرفان نواز میمن اور ڈی آئی جی آپریشن اسلام آباد نے ریڈ زون کا دورہ کیا اور احتجاج کے مقامات پر بریفنگ لی۔