کراچی کے مختلف علاقوں میں فائرنگ اور تشدد سے خاتون سمیت 3 افراد قتل

پولیس اور رینجرز نے مختلف علاقوں میں کارروائی کرکے بھتہ خور اور ٹارگٹ کلرز سمیت 80 سے زائد ملزمان کو حراست میں لے لیا۔ فوٹو: فائل

---

شہر میں تشدد اور فائرنگ کے واقعات میں خاتون سمیت 3 افراد کو قتل کر دیا گیا جب کہ پولیس اور رینجرز نے مختلف علاقوں میں کارروائی کرکے 80 سے زائد ملزمان کو حراست میں لے لیا۔

ایکسپریس نیوز کے مطابق عوامی کالونی کورنگی میں 3 ملزمان نے فیکٹری مالک محمد یاسین سے نقدی چھین لی جب کہ مالک کی جانب سے مزاحمت کرنے پر فائرنگ کرکے اسے قتل کردیا۔ ادھر قائد اعظم کالونی گلشن اقبال میں جھاڑیوں سے خاتون کی لاش ملی ہے، پولیس کےمطابق خاتون کوگلاگھونٹ کرقتل کیاگیا جب کہ اتحاد ٹاون میں مسعود احمد نامی شخص کوفائرنگ کرکے قتل کردیا گیا۔

دوسری جانب رینجرز اور پولیس نے شہر کے مختلف علاقوں میں چھاپے مار کر 8 ملزمان کو حراست میں لے لیا۔ گرفتار ملزمان میں بھتہ خور، ٹارگٹ کلر، اشتہاری اور مفرور ملزمان بھی شامل ہیں جب کہ ان کے قبضے سے اسلحہ، منشیات اور دیگر سامان بھی برآمد ہوا۔