سی ٹی ڈی اور حساس ادارے کی دو الگ الگ کارروائیوں میں 6 مبینہ دہشت گرد گرفتار

سی ٹی ڈی نے کراچی میں چینی کلینک پر فائرنگ میں ملوث مزید دو دہشت گردوں کی گرفتاری ظاہر کردی (فوٹو : فائل)

---

سی ٹی ڈی اور حساس ادارے کی دو الگ الگ کارروائیوں میں 6 مبینہ دہشت گردوں کو گرفتارکرلیا گیا، دو دہشت گرد چینی کلینک پر حملے میں ملوث ہیں جب کہ چار ملزمان کالعدم تنظیموں کو بیرون ملک سے بارودی مواد اسمگل کرکے فراہم کرتے تھے۔

ایکسپریس نیوز کے مطابق سی ٹی ڈی انٹیلی جنس ونگ اور حساس ادارے نے حب ریور روڈ مواچھ گوٹھ قبرستان کے قریب کارروائی کرتے ہوئے کالعدم تنظیم راجی آجوئی سنگر سمیت دیگر علیحدگی پسند کالعدم تنظیموں کے دہشت گردوں کو بارودی مواد فراہم کرنے والے 4 مبینہ دہشت گرد میرعلی شاہ، محمد اقبال، نصر اللہ اور محمد کو گرفتار کرلیا۔

ملزمان کے قبضے سے کمرشل ایکسپلوزو کی 7 بڑی اسٹکس، 18 چھوٹی اسٹکس، سیفٹی ٹائم فیوز (تقریبا 88 فٹ) اور 3 نان الیکٹرک ڈیٹونیٹر برآمد کرلیے گرفتار ملزمان کالعدم تنظیم کے دہشت گردوں کو بارودی مواد پہنچانے کے لیے حب بلوچستان سے مواچھ گوٹھ قبرستان پہنچے تھے۔

ملزمان کے قبضے سے برآمد کیا جانے والا بارودی مواد شہر میں دہشت گردی کی کارروائیوں میں استعمال ہونا تھا، گرفتار ملزمان گزشتہ ایک سال سے بارودی مواد سپلائی کرنے کا کام کر رہے تھے اور اس سے قبل دو سے تین مرتبہ بارودی مواد سپلائی کر چکے تھے۔

ملزمان یہ بارودی مواد بیرون ملک سے اسمگل کرکے لاتے تھے، گرفتار مبینہ دہشت گردوں سے مزید تفتیش جاری ہے۔

سی ٹی ڈی نے چینی کلینک پر فائرنگ میں ملوث مزید دو دہشت گردوں کی گرفتاری ظاہر کردی

 

ادھر سی ٹی ڈی سندھ نے گزشتہ ماہ صدر کے علاقے میں ڈینٹل کلینک پر فائرنگ کے واقعے کے الزام میں حراست میں لیے جانے والے دو مبینہ دہشت گردوں کی گرفتاری ظاہرکردی۔

گرفتار دہشت گردوں میں نبیل احمد اور سہولت کار وزیر علی شامل ہیں۔ گرفتار دہشت گردوں کو مبینہ ٹاؤن تھانے کی حدود گلزاہرہجری ماڈل پارک کے قریب سے ایک مشترکہ کارروائی کے دوران گرفتارکیا گیا۔ گرفتار دہشت گردوں کا ساتھی وقار احمد خشک پہلے ہی گرفتار ہوچکا ہے۔

گرفتار دہشت گرد نیبل احمد واردات کے وقت وقار احمد کے ساتھ موٹر سائیکل پر سوار تھا جبکہ وزیر علی خشک سہولت کار ہے، دہشت گردوں کا تعلق کالعدم علیحدگی پسند تنظیم ایس آر کے کی ذیلی تنظیم ایس پی اے سے ہے۔ گرفتار دہشت گردوں کے قبضے سے اسلحہ بھی برآمد کیا گیا۔

یاد رہے کہ چینی ڈینٹل کلینک پر فائرنگ کے واقعے میں دہری شہریت کے حامل شخص رونلڈ رائمنڈ چاؤ جاں بحق اور ڈاکٹر رچرڈ ہونوں اور ان کی اہلیہ فن ٹائن پاؤ زخمی ہوئی تھیں۔