بنوں میں دو گروپوں میں مسلح تصادم خاتون سمیت دو جاں بحق
فائرنگ کی زد میں آکر تین راہ گیر بھی زخمی ہوئے جنہیں اسپتال منتقل کردیا گیا، پولیس
خیبرپختونخوا کے ضلع بنوں میں دو گروپوں کے درمیان تصادم میں خاتون سمیت دو افراد جاں بحق ہوگئے۔
ایکسپریس نیوز کے مطابق بنوں کے علاقے منڈان میں دو گروپوں کے درمیان مسلح تصادم ہوا، جس میں دونوں فریقین نے ایک دوسرے پر کھلے عام فائرنگ کی۔
فائرنگ کے نتیجے میں خاتون سمیت دو افراد جاں بحق جبکہ سڑک پر چلنے والے تین راہگیر گولیوں کی زد میں آکر زخمی ہوئے۔
واقعے کی اطلاع ملنے پر پولیس کی بھاری نفری جائے وقوعہ پر پہنچی اور لاشوں کو ضابطے کی کارروائی جبکہ زخمیوں کو طبی امداد کے لیے اسپتال منتقل کردیا۔
پولیس افسر نے موقع پر میڈیا سے گفتگو کرتے ہوئے کہا کہ واقعہ بظاہر جائیداد کے لین دین کا تنازع معلوم ہورہا ہے تاہم کوئی بھی حتمی بات تحقیق کے بعد ہی کی جائے گی۔