ایک شخص انتشار پھیلانے کیلیے ہرلائن عبور کررہا ہے آصف زرداری

دشمن نے اس دفعہ اندر کے لوگوں ہی سے حملہ کروایا ہے، سابق صدر (فوٹو فائل)

---

پیپلز پارٹی پارلیمنٹرینز کے صدر آصف علی زرداری نے کہا ہے کہ ایک شخص ملک میں انتشار پھیلانے کے لیے ہرلائن عبور کررہا ہے۔

ملکی اداروں کے خلاف سخت بیانات کی مذمت کرتے ہوئے آصف علی زرداری نے کہا کہ ہم اپنی پاک فوج کی قربانیوں اور شہادتوں کو کبھی بھلا نہیں سکتے۔ ہم دشمن کی اس سازش کو بھی ناکام بنائیں گے۔

انہوں نے کہا کہ دشمن نے اس دفعہ اندر کے لوگوں ہی سے حملہ کروایا ہے۔ 1947ء سے لے کر اب تک ہم نے اور اداروں نے مل کر دشمن کا مقابلہ کیا ہے اور آئندہ بھی کریں گے۔سابق صدر کا کہنا تھا کہ اداروں کی بقا ہی سے ملک کی بقا ہے اور ہم کسی بھی صورت ان پر حملہ برداشت نہیں کریں گے۔

چیئرمین پی ٹی آئی عمران خان کانام لیے بغیر تنقید کرتے ہوئے آصف زرداری نے کہا کہ اس شخص کو صرف اقتدار، اقتدار اور اقتدار کے سوا کچھ نظر نہیں آتا۔ اس شخص کو ملک کی سالمیت کی فکر ہے نہ ملک کے اداروں کی۔ ایک شخص ملک میں انتشار پھیلانے کے لیے ہر لائن عبور کر رہا ہے۔