شاہ لطیف تھانے ٹاؤن کے علاقے در محمد گوٹھ میں مبینہ پولیس مقابلے میں 2 ڈاکو ہلاک ہوگئے جبکہ تیسرے ڈاکو کو زخمی حالت میں گرفتار کر لیا۔

ڈاکوؤں کی لاشیں رات گئے ضابطے کی کارروائی کے لیے جناح اسپتال لے جائی گئیں جبکہ زخمی تیسرے ڈاکو کو طبی امداد دی گئی۔

ریسکیو حکام کا کہنا ہے کہ فوری طور پر ہلاک ہونے والوں کی شناخت نہیں ہو سکی جبکہ اس ضمن میں پولیس مزید معلومات حاصل کر رہی ہے۔

اطلاعات کے مطابق مقابلہ اسٹیل ٹاؤن پولیس نے کیا تھا جبکہ اس بات کا بھی شبہ ظاہر کیا جا رہا ہے کہ ہلاک ڈاکو شاہ لطیف ٹاؤن کے علاقے میں ٹرک ڈرائیور بہادر خان کے قتل میں بھی ملوث ہو سکتے ہیں تاہم پولیس تمام پہلوؤں پر تحقیقات کر رہی ہے۔