کراچی میں رواں سال کی 12 ویں بینک ڈکیتی ملزمان 51 لاکھ لوٹ کر فرار

ڈاکو سی سی ٹی وی فوٹیج بھی اپنے ساتھ لے گئے، پولیس۔ فوٹو؛ایکسپریس نیوز/فائل

---

شہر میں دن دہاڑے بینک ڈکیتیوں کی وارداتیں ہیں کہ رکنے کا نام ہی نہیں لے رہی ڈاکو آج بھی ایک بینک سے چند منٹوں میں 51 لاکھ 59 ہزار روپے لوٹ کر فرار ہو گئے۔

ایکسپریس نیوز کے مطابق ایس ایچ او بہادر آباد زاہد حسین کا کہنا ہے کہ کراچی کے علاقے بہادر آباد میں 7 ملزمان قومی بچت بینک میں داخل ہوئے، انھوں نے بینک کے عملے اور سیکیورٹی گارڈز کو یرغمال بنایا اور صرف 3 منٹ میں بینک سے 51 لاکھ 59 ہزار روپے لوٹ کر با آسانی فرار ہو گئے، 4 ڈاکوؤں نے شلوار قمیض جب کہ 3 نے پینٹ شرٹ پہن رکھی تھی، ڈاکو سی سی ٹی وی فوٹیج بھی اپنے ساتھ لے گئے. پولیس حکام کا کہنا ہے کہ بینک عملے کے تعاون سے ملزمان کے تصویری خاکے جاری کئے جائیں گے۔

پولیس اعدادو شمار کے مطابق یہ رواں برس کی بارہویں بینک ڈکیتی ہے۔ اس سے قبل ڈاکو ایف بی ایریا میں یوسف پلازہ کے نزدیک واقع ایک نجی بینک سے 80 لاکھ روپے لوٹ کر فرار ہو گئے تھے۔