فیروز خان کی کورٹ میں بچوں سے ملاقات کی جذباتی ویڈیوز وائرل
کراچی کے کورٹ میں فیروز خان کی جانب سے بچوں سے ملاقات اور حوالگی کے لیے دائر کی گئی درخواست کی سماعت ہوئی
معروف اداکار فیروز خان نے فیملی کورٹ میں اپنے بچوں سے ملاقات کی جس کی ویڈیوز سوشل میڈیا پر وائرل ہورہی ہیں۔
کراچی کی فیملی کورٹ میں فیروز خان کی جانب سے بچوں سے ملاقات اور حوالگی کے لیے دائر کی گئی درخواست کی سماعت ہوئی۔
کیس کی سماعت کے بعد فیروز خان کو ان کے بچوں سلطان اور فاطمہ سے ملنے کی اجازت بھی دی گئی۔
سوشل میڈیا کے مختلف پیجز پر اداکار کی اپنے بچوں سے عدالت میں ہونے والی ملاقات کی ویڈیوز وائرل ہورہی ہیں۔
ایک ویڈیو میں فیروز خان اپنے دونوں بچوں کو گود میں اُٹھائے عدالت میں ایک کمرے میں داخل ہوتے نظر آرہے ہیں، اس دوران اداکار کی سابقہ اہلیہ علیزے کے وکیل بھی ان کے ساتھ موجود ہیں۔
ویڈیو میں فیروز خان کو اپنے بیٹے سلطان کا ہاتھ تھامے عدالت سے باہر نکلتے ہوئے دیکھا جاسکتا ہے۔
اس دوران اداکار کے بیٹے سلطان کو والد سے یہ پوچھتے ہوئے سنا جاسکتا ہے کہ'آپ میرے ساتھ باہر جارہے ہیں'۔
جس پر فیروز خان بیٹے کو تسلی دیتے ہوئے کہتے ہیں کہ'ہاں، آپ میرے ساتھ جا رہے ہیں'۔
فیروز خان اور بچوں کی ملاقات کی ان وائرل ویڈیوز پر سوشل میڈیا صارفین کی جانب سے والدین میں علیحدگی کے بعد بچوں کے مستقبل اور ان کی ذہنی صحت کے حوالے سے تشویش کا اظہار کیا جارہا ہے۔