پارٹی قیادت کے حکم پر مصطفیٰ نواز کھوکھر کا سینیٹ کی نشست چھوڑنے کا اعلان
سیاسی کارکن کے طور پرمفاد عامہ کے معاملات پراپنی رائے کا اظہار کرنے کا حق رکھتا ہوں، پارٹی قیادت خوش نہیں، مصطفیٰ نواز
پاکستان پیپلزپارٹی کے رہنما مصطفی نواز کھوکھر نے پارٹی قیادت کی ہدایت پر سینیٹ کی نشست سے استعفیٰ دینے کا اعلان کردیا۔
سماجی رابطے کی سائٹ پر مصطفیٰ نواز کھوکھر نے بتایا کہ میری پیپلزپارٹی کے سینئر رہنما سے ملاقات ہوئی، جس میں انہوں نے بتایا کہ قیادت میری سیاست سے خوش نہیں اور سینیٹ کی نشست سے استعفیٰ دینے کی ہدایت کی ہے، میں اپنا تحریری استعفی چیئرمین سینیٹ کو ارسال کروں گا۔
انہوں نے کہا کہ سیاسی کارکن کے طور پرمفاد عامہ کے معاملات پراپنی رائے کا اظہار کرنے کا حق رکھتا ہوں،سندھ سے سینیٹ کی نشست دینے پر پارٹی قیادت کا شکر گزار ہوں۔ اختلافات کوایک طرف رکھتے ہوئے پارٹی قیادت کے ساتھ شاندار سفر رہا، ان کے مستقبل کیلیے نیک تمنائیں ہیں۔
واضح رہے کہ مصطفیٰ نواز کھوکھر نے اعظم سواتی کے ساتھ پیش آنے والے ویڈیو واقعے پر آواز اٹھائی اور اپنے شدید تحفظات کا اظہار کیا تھا۔