خیبرپختونخوا حکومت کا میڈیکل کالجز کی داخلہ ٹیسٹ فیس میں کمی کا اعلان

فوٹو: فائل

---

محکمہ تعلیم خیبرپختونخوا نے میڈیکل کالجز داخلہ ٹیسٹ ٖفیس میں شریک ہونے والے طلبا کی فیس میں 5 ہزار روپے کی کمی کردی ہے۔

صوبائی وزیر برائے اعلیٰ تعلیم کامران بنگش کی زیر صدارت اجلاس میں فیصلہ کیا گیا کہ پاکستان میڈیکل کمیشن کی طرف سے میڈیکل کالجز داخلہ ٹیسٹ کیلئے وصول کی جانے والی فیس 6 ہزار روپے میں سے ہر امیدوار کو پانچ ہزار روپے واپس کر دئیے جائیں گے۔

وزیر تعلیم کے مطابق خیبرپختونخوا میڈیکل یونیورسٹی کے ذریعے بقیہ رقم امیدوار کو واپس کر دی جائے گی،خیبرپختونخوا میں 13 نومبر کو میڈیکل کالجز کے لیے داخلہ ٹیسٹ منعقد ہو رہا ہے۔

میڈیکل کالجز کیلئے ہونے والے ٹیسٹ میں مجموعی طور پر 46 ہزار طلبہ ٹیسٹ دے رہے ہیں، خیبرپختونخوا میں ایٹا کے زیر اہتمام میڈیکل کالجز داخلہ ٹیسٹ 7 مقامات پر لیا جائے گاجن میں 28 ہزار سے زیادہ طلبہ پشاور میں منعقد ہونے والے داخلہ ٹیسٹ میں شریک ہونگے۔

کامران بنگش کے مطابق میڈیکل کالجز داخلہ ٹیسٹ کا دورانیہ 210 منٹس پر مشتمل ہوگا،ٹیسٹ دینے والے امیدوار کا پیپر 200 ایم سی کیوز پر مشتمل ہوگا،امیدوار کو کاربن کاپی کے بجائے اوریجنل آنسر شیٹ کی سکین کاپی مہیا کی جائے گی۔

صوبائی وزیر کا کہنا ہے کہ داخلےٹیسٹ کا نتیجہ سات دن میں ٹیسٹ میں شریک ہونے والے طلبہ سے شئیر کرلیا جائےگا۔