پاکستان فٹبال ٹیم 3 سال بعد پہلا انٹرنیشنل میچ کھیلنے کیلئے تیار
پاکستان نے اپنا آخری انٹرنیشنل میچ 2019 میں فیفا ورلڈکپ کوالیفائرز میں کمبوڈیا کیخلاف کھیلا تھا
پاکستان فٹبال ٹیم 3سال بعد پہلا انٹرنیشنل میچ کھیلنے کیلئے تیار ہے، اس میچ میں قومی ٹیم کی قیادت حسن بشیر کریں گے جب کہ دوستانہ فٹبال میچ کیلئے اسکواڈ 13 نومبر (اتوار) کو نیپال روانہ ہوگا۔
ایکسپریس نیوز کے مطابق پاکستان فٹبال ٹیم تین برس بعد اپنا پہلا انٹرنیشنل میچ کھیلنے کیلئے 13 نومبر کو نیپال روانہ ہوگی، قومی ٹیم کی قیادت حسن بشیر کریں گے جب کہ محمد عمر حیات ان کے نائب ہوں گے۔
منتخب کھلاڑیوں میں گول کیپرز ثاقب حنیف، یوسف اعجاز بٹ اور عبدالباسط، ڈیفینڈرز زین (جونیئر)، سہیل خان، سید جنید علی شاہ، عبداللہ شاہ، مامون موسی، عبداللہ اقبال، سردار ولی اور حسیب خان، مڈ فیلڈرز عمیر علی،زین العابدین اسحاق ،عبدالقدیر خان،عالمگیر غازی، محمد عدنان یعقوب اور عدنان سعید، فارورڈز محمد افضل، محمد وحید، محمد ولید خان اور شائق دوست شامل ہیں۔شہزاد انور ہیڈ کوچ،محمد حبیب اسسٹنٹ کوچ،زاہد تاج گول کیپنگ کوچ، ڈاکٹر عدنان فزیو، ارتضی حسین منیجر، حسنین حیدر (میڈیا)،محمد علی ٹیم کوارڈینیٹر، حیدر علی(میڈیا) اور عبدالقیوم مساجر کے طور پر ہمراہ ہوں گے۔
پاکستانی اسکواڈ اتوار کو فیصل آباد سے اڑان بھرنے کے بعد ٹور کا واحد دوستانہ میچ 16 نومبر کو پاکستانی وقت کے مطابق شام 4:15 پر کھیلے گا۔
یاد رہے کہ پاکستان نے اپنا آخری انٹرنیشنل میچ 2019 میں فیفا ورلڈکپ کوالیفائرز میں کمبوڈیا کیخلاف کھیلا تھا۔
پی ایف ایف نارملائزیشن کمیٹی کے چیئرمین ہارون ملک کا کہنا ہے کہ قومی ٹیم 3سال کے بعد انٹرنیشنل ٹریک پر واپس آرہی ہے، پاکستانی فٹبالرز کو اپنے ملک کی نمائندگی کا موقع مل رہا ہے، ان کو صلاحیتوں میں نکھار لانے اور اعتماد میں بھی اضافہ کا موقع ملے گا۔
ہیڈ کوچ شہزاد انور کا کہنا ہے کہ 7 ہفتے پر محیط ٹریننگ کے بعد اسکواڈ کو حتمی شکل دی گئی ہے،امید ہے کہ کھلاڑی جوش اور جذبے سے کھیلتے ہوئے کامیابی حاصل کریں گے۔