ایپل کمپنی کے شریک بانی اسٹیو جابز کے سینڈل دو لاکھ ڈالر میں نیلام

1970 اور 80 کی دہائی میں اسٹیو جابز نے طویل عرصے تک برکنسٹاک کےسینڈل کا جوڑا استعمال کیا تھا

ویب ڈیسک November 16, 2022

ایپل کمپنی کے شریک بانی کے استعمال شدہ سینڈل پاکستانی ساڑھے چار کروڑ روپے میں نیلام ہوئے ہیں۔ فوٹو: واشنگٹن پوسٹ

ایپل کمپنی کے شریک بانی اسٹیوجابز کے سینڈل دو لاکھ 18 ہزار ڈالر میں نیلام ہوئے ہیں جن کی قیمت پاکستانی روپوں میں 4 کروڑ 40 لاکھ کے برابر ہے۔

اسٹیوجابز نے انہیں اتنی مرتبہ پہنا تھا کہ گویا قدموں کے نشان سینڈل پر چھپ چکے ہیں۔ کیلیفورنیا کے ایک نیلام گھر جولین آکشن نے اسے بطور نان فنجیبل ٹوکن (این ایف ٹی) فروخت کیا ہے جس پر ایک نامعلوم شخص نے دو لاکھ 18 ہزار ڈالر کی رقم ادا کی ہے۔

نیلام گھر کےمطابق1970 اور 80 کی دہائی میں اکثر مرتبہ یہ سینڈل اسٹیو جابز کےپیروں میں دیکھا جاسکتا تھا۔ کارک اور پٹ سن سے بنے یہ سینڈل برسوں کے استعمال کے بعد گھس چکے ہیں اور ان پر انگلیوں اور ایڑھیوں کے دباؤ سے گڑھے بن چکے ہیں جنہیں برکن اسٹاک سینڈل بھی کہا جاتا ہے۔

2011 میں وفات پاجانے والے اسٹیو جابز نے ایک دوست کے ساتھ ملکر ایپل کمپنی کی بنیاد رکھی تھی اور ان کی محنت اور ذہانت سے آئی فون اور دیگر مصنوعات آج دنیا کے کروڑوں صارفین استعمال کررہے ہیں۔