کراچی میں مختار کار کو قتل کرنے کے الزام میں باپ بیٹا گرفتار

فوٹو:فائل

---

سرجانی ٹاؤن پولیس نے مختار کار منگھوپیر قتل کیس میں نامزد 2 ملزمان باپ اور بیٹے کو گرفتار کرلیا ہے۔

پولیس نے انسداد تجاوزات آپریشن کے دوران فائرنگ کر کے مختار کار منگھوپیر کو قتل کرنے کے الزام میں لینڈ مافیا کے انتہائی مطلوب 2 ملزمان باپ اور بیٹے کو گرفتار کرلیا.

ایس ایچ او سرجانی ٹاؤن یاسین گجر نے بتایا کہ گرفتار ملزمان میں امان اللہ اور اس کا بیٹا بخت شیر شامل ہے، دونوں ملزمان مختار کار منگھوپیر اعجاز احمد چانڈیو کے قتل کے مقدمے میں نامزد ہیں۔

انھوں ںے بتایا کہ امان اللہ زمینوں پر قبضے اور ڈکیتی کی وارداتوں میں ملوث ہے جس کے خلاف 20 مقدمات درج ہیں جبکہ اس کے بیٹے کے خلاف سرجانی ٹاؤن تھانے میں بھی متعدد مقدمات درج ہیں۔

ایس ایچ او کے مطابق مختار کار کے قتل میں جن نامزد ملزمان کے خلاف مقدمہ درج کیا گیا ہے وہ سب آپس میں رشتے دار ہیں, پولیس مقدمہ میں نامزد دیگر ملزمان کی تلاش میں چھاپے مار رہی ہے۔