اسلام آباد حوالہ ہنڈی کا ملزم ایف آئی اے کے ہاتھوں گرفتار غیر ملکی کرنسی برآمد

ملزم تفتیشی حکام کو کرنسی رکھنے کا جواز پیش کرنے میں ناکام رہا

---

ایف آئی اے کمرشل بینکنگ سرکل کی ایک کارروائی میں حوالہ ہنڈی کا ملزم گرفتارہوگیا، جس کے قبضے سے غیر ملکی کرنسی برآمد ہوئی ہے۔

ایکسپریس نیوز کے مطابق ایف آئی اے کمرشل بینکنگ سرکل اسلام آبادنے خفیہ اطلاع پر حوالہ ہنڈی سرگرمیوں کے خلاف کارروائی کے دوران غیر قانونی کام میں ملوث ایک ملزم محمد زاہد کو بلیو ایریا سے گرفتار کرلیا۔

دوران تلاشی ملزم کی گاڑی سے 23 ہزار 500 سعودی ریال اور 28 لاکھ روپے برآمد کرلیے گئے۔ ملزم تفتیشی حکام کے سامنے برآمد ہونے والی کرنسی رکھنے کے حوالے سے جواز پیش کرنے میں ناکام رہا۔

ایف آئی اے کمرشل بینکنگ سرکل اسلام آباد نے گرفتار ملزم کے خلاف مقدمہ درج کرکے مزید تحقیقات شروع کردی ہے۔