پاکستان میں کسی ایک سیاسی پارٹی کے مقابلے میں دوسرے کی حمایت نہیں کرتے امریکا

پہلے بھی کہا تھا کہ امریکی سازش کے الزامات میں کوئی سچائی نہیں، ڈپٹی ترجمان امریکی محکمہ خارجہ

ویب ڈیسک November 17, 2022

پاکستان کے ساتھ دیرینہ تعلقات کو پروپیگنڈے اور غلط اطلاعات سے متاثر نہیں ہونے دیں گے، امریکی محکمہ خارجہ:فوٹو:فائل

امریکی محکمہ خارجہ کا کہنا ہے کہ پاکستان میں کسی ایک سیاسی پارٹی کے امیدوار کے مقابلے میں دوسرے کی حمایت نہیں کرتے۔

امریکی محکمہ خارجہ کے ڈپٹی ترجمان ویدانت پٹیل نے میڈیا بریفنگ میں کہا کہ امریکا پروپیگنڈے، غلط اور گمراہ کن اطلاعات کو پاکستان کے ساتھ دو طرفہ تعلقات کی راہ میں آنے نہیں دے گا۔ پاکستان ہمارا اہم پارٹنر ہے۔

ترجمان کا مزید کہنا تھا کہ خوشحال اورجمہوری پاکستان اور پاکستان کے ساتھ دیرینہ تعاون امریکا کے لیے اہم ہے اور اس موقف میں کبھی کوئی تبدیلی نہیں آئی ہے۔

پی ٹی آئی کے چئیرمین عمران خان کے امریکی سازش سے متعلق نئے بیان پرڈپٹی ترجمان امریکی محکمہ خارجہ کا کہنا تھا کہ ہم نے پہلے بھی کہا تھا کہ ان الزامات میں کوئی سچائی نہیں ہے۔ اس بارے میں ہمارے پاس مزید کچھ کہنے کو نہیں ہے۔