نئے آرمی چیف کی تعیناتی کے لیے سمری وزیراعظم دفتر کو موصول ذرائع

وزیراعظم دفترکو موصول ہونے والی سمری میں پانچ نام موجود ہیں، ذرائع

ویب ڈیسک November 21, 2022

نئے آرمی چیف 29 نومبر کو عہدے کا چارج سنبھالیں گے:فوٹو:فائل

نئے آرمی چیف کی تعیناتی کے لیے سمری وزیراعظم دفتر کو موصول ہوگئی۔

'ایکسپریس ٹریبیون' نے ذرائع کے حوالے سے بتایا کہ وزیراعظم کے دفترکووزارت دفاع کی جانب سے نئے آرمی چیف کی تعیناتی کے لیے سمری موصول ہوگئی ہے۔

ذرائع کے مطابق سمری میں پانچ نام موجود ہیں۔وزیراعظم ہاؤس میں اعلیٰ سطح کا اجلاس جاری ہے جس میں اہم تعیناتی سمیت دیگر امور پر غور کیا جا رہا ہے۔

نئے آرمی چیف 29 نومبر کو اپنے عہدے کا چارج سنبھالیں گے۔ جنرل قمر جاوید باجوہ بطور آرمی چیف چھ سال فرائض انجام دینے کے بعد 29 نومبر کو ریٹائر ہوں گے۔

سینیارٹی لسٹ کے مطابق لیفٹیننٹ جنرل عاصم منیر، لیفٹیننٹ جنرل ساحر شمشاد مرزا، لیفٹیننٹ جنرل اظہر عباس ، لیفٹیننٹ جنرل نعمان محمود اور لیفٹیننٹ جنرل فیض حمید میں سے کوئی بھی آرمی چیف اور چئیرمین جوائنٹ چیفس آف اسٹاف کا عہدہ سنبھال سکتے ہیں۔