پی ٹی آئی دھرنا ریاست کے سامنے کوئی کھڑا نہیں ہو سکتا اسلام آباد ہائیکورٹ
کنٹینر لگانا مسئلے کا حل نہیں، راولپنڈی میں کچھ ہوتا ہے تو بھی اسلام آباد آنیوالوں کو دشواری ہو سکتی ہے، چیف جسٹس
اسلام آباد ہائی کورٹ کے چیف جسٹس عامر فاروق نے پی ٹی آئی دھرنے سے متعلق کیس کی سماعت کے دوران ریمارکس دیے ہیں کہ ریاست کے سامنے کوئی کھڑا نہیں ہو سکتا۔
پاکستان تحریک انصاف کے متوقع دھرنے کے خلاف تاجروں کی درخواست پر سماعت کرتے ہوئے چیف جسٹس عامر فاروق نے کہا کہ دھرنے سے متعلق سپریم کورٹ اور اسلام آباد ہائی کورٹ کا فیصلہ موجود ہے۔ کنٹینر لگانا کوئی مسئلے کا حل نہیں۔ انتظامیہ کوئی جدید طریقہ اختیار کرے۔
چیف جسٹس اسلام آباد ہائیکورٹ جسٹس عامر فاروق نے ریمارکس دیے کہ ریاست کے سامنے کوئی کھڑا نہیں ہو سکتا۔ اگر راولپنڈی میں کچھ ہوتا ہے تو بھی اسلام آباد آنے والوں کو دشواری ہو سکتی ہے۔ عدالت نے پی ٹی آئی کی طرف سے درخواست واپس لیے جانے پر تاجروں کی درخواست نمٹادی۔
دریں اثنا عدالت نے اسلام آباد میں جلسے و دھرنے کی اجازت نہ دینے کے خلاف پی ٹی آئی کی درخواست بھی نمٹادی۔
چیف جسٹس عامر فاروق کے روبرو سماعت کے دوران تحریک انصاف نے اسلام آباد ہائی کورٹ سے اپنی درخواست واپس لے لی، جس پر عدالت نے درخواست نمٹادی۔