یوٹیوب نے سال 2022 کی مشہور ترین ویڈیو اور یوٹیوبر کی تفصیلات پیش کردیں

یوٹیوب نے سال 2022 کی مقبول ترین ویڈیو اور یوٹیوبر کی فہرست جاری کردی ہے۔ فوٹو: فائل

---

آن لائن ویڈیو کے سب سے بڑے پلیٹ فارم یوٹیوب نے سال 2022 کی مقبول ترین ویڈیو، یوٹیوبر کے چینل اور اشتہارات کی تفصیلات دی ہیں جنہیں یہاں دیکھا جاسکتا ہے۔

تاہم یہ رحجانات صرف امریکا سے تعلق رکھتے ہیں۔ اس میں گیمنگ سے وابستہ چینل ٹیکنوبلیڈ کی ایک ویڈیو نمبر ایک پر رہی جس میں ان کے والد کی کینسر سے موت سے قبل آخری پیغام دکھایا گیا تھا۔ اس ویڈیو کو 8 کروڑ 70 لاکھ افراد نے دیکھا تھا۔

دوسری ویڈیو آسکر ایوارڈ کے اس ناخوشگوار واقعے کی ہے جس میں وِل اسمتھ نے کرِس راک کو تھپڑ مارا تھا۔ اس کے علاوہ گیمنگ کے انفلوئنسرز کی ویڈیو بھی بہت مقبول ہوئیں۔ کیونکہ اس سال لوگوں نے ویڈیو گیم میں غیرمعمولی دلچسپی کا اظہار کیا۔

تاہم گزشتہ برس کی طرح مسٹر بیسٹ کا چینل سب سے آگے رہا جن کے سبسکرائبر کی تعداد 11 کروڑ 40 لاکھ سے زائد ہے۔ اس کے علاوہ نیش ایل ایم اے او، ایئر ریک، ریان ٹراہان اور برینٹ ریویرا کے چینل ٹاپ ٹین میں شامل رہے۔ تاہم مسٹر بیسٹ نے اپنا کاروبار بھی بڑھایا اور بیسٹ برگر اور فیسٹیبل کے نام سے چاکلیٹ کی پیداوار بھی شروع کی ہے جو ایک کامیاب کاروبار میں ڈھل چکی ہے۔

اس سال اہم ترین یوٹیوبرز نے کئی چیلنجز قبول کیے اور ان کی ویڈیو بناکر پوسٹ کی جن میں ایک درجے سینٹی گریڈ سردی میں پورادن گزارنا یا میٹا ورس میں 24 گھنٹے رہنے جیسے کام شامل تھے۔

اس کےعلاوہ ٹیوب نے مقبول ترین مارکیٹنگ اور اشتہارات کا ذکر بھی کیا جن میں ایمیزون، مصر ٹیلی کام، ایپل، ہونڈائی ورلڈوائڈ، ایچ بی او میکس اور نیٹ فلکس شامل ہیں۔ یوٹیوب کے مطابق سال 2022 بہت دلچسپ تھا جسے ایپ پر دیکھا گیا تھا۔ اس رحجان کو دیکھ کر یوٹیوبر اور کمپنیاں اپنی حکمتِ عملی وضع کرسکتے ہیں۔