جوروٹ نے گیند چمکانے کا انوکھا طریقہ ڈھونڈ نکالا ویڈیو وائرل
بالنگ کے دوران کپڑوں سے مسل کر بال چمکانے کے بجائے انگلش کرکٹر جوروٹ نے بال چمکانے کا نیا طریقہ ڈھونڈ نکالا
پاکستان اور انگلینڈ کے درمیان پنڈی ٹیسٹ میں انگلش کرکٹر جوروٹ نے لیچ کے سر سے گیند چمکادی، ویڈیو سوشل میڈیا پر وائرل ہوگئی۔
بالنگ کے دوران کپڑوں سے مسل کر بال چمکانے کے بجائے انگلش کرکٹر جوروٹ نے بال چمکانے کا نیا طریقہ ڈھونڈ نکالا جس کو دیکھ کر کمنٹیٹر بھی ہنسی پر قابو نہ کر سکے۔
سوشل میڈیا پر وائرل ہونے والی ویڈیو میں دیکھا جاسکتا ہے کہ بال کو تھوک لگانے پر پابندی کے بعد پنڈی ٹیسٹ میں انگلش کرکٹر جو روٹ نے ساتھی کرکٹر لیچ کی کیپ اتاری اور ان کے سر سے گیند مسل دی۔
روٹ نے لیچ کے سر پر بال کم ہونے کی وجہ سے سر کے مختلف حصوں پر گیند لگائی اور بال چمکا کر آگے بڑھ گئے یہ منظر دیکھ کر ساتھی کھلاڑی بھی ہنس پڑے جبکہ لیچ حیرت میں پڑ گئے۔
روٹ کی اس مزاحیہ حرکت پر کمنٹیٹرنے بھی خوب قہقہے لگائے ناصر حسین نے ساتھی کمنٹیٹر کو مذاقاً کہا کہ وہ ان کی طرف نہ دیکھیں۔
پاکستان کرکٹ کی جانب سے اس ویڈیو کو ٹوئٹر پر شیئر کیا گیا جس پر شائقین ِ کرکٹ اور ٹوئٹر صارفین بھی بھرپور تبصرے کر رہے ہیں۔