حکومت مذاکرات میں تاخیر سے کام نہ لے پروفیسر ابراہیم

وزیرداخلہ نےچند مسائل پروزیراعظم سے مشاورت کیلئےوقت مانگا تھا لیکن ابھی تک کوئی جواب نہیں ملا، پروفیسرابراہیم

ویب ڈیسک April 02, 2014

حکومتی جواب سامنے آنے کے بعد طالبان سیز فائر میں توسیع کا باقاعدہ اعلان کریں گے، رکن طالبان مذاکراتی کمیٹی۔ فوٹو: فائل

طالبان کمیٹی کے رکن پروفیسر ابراہیم کا کہنا ہے کہ جب تک مذاکرات جاری ہیں اس وقت تک فائر بندی جاری رہے گی لیکن حکومت مذاکرات کے حوالے سے تاخیر سے کام نہ لے۔

ایکسپریس نیوز سے بات کرتے ہوئے پروفیسر ابراہیم کا کہنا تھا کہ وفاقی وزیر داخلہ چوہدری نثار علی خان نے چند مسائل پر وزیراعظم نواز شریف سے مشاورت کے لئے وقت مانگا تھا لیکن حکومت کی جانب سے ابھی تک کوئی جواب نہیں دیا گیا۔ ان کا کہنا تھا کہ جب تک مذاکرات جاری ہیں اس وقت تک فائربندی جاری رہے گی لیکن حکومتی جواب سامنے آنے کے بعد طالبان سیز فائر میں توسیع کا باقاعدہ اعلان کریں گے۔

واضح رہے کہ گزشتہ ماہ حکومت اور طالبان کمیٹی کے ارکان نے شمالی وزیرستان میں نامعلوم مقام پر براہ راست ملاقات کی تھی جس میں دونوں جانب سے قیدیوں کی رہائی سمیت مخلتف معاملات پر بات چیت کی گئی تھی اور پھر طالبان نے 31 مارچ تک سیز فائر کا اعلان کیا تھا۔