ٹی ٹوئنٹی ورلڈ کپ میں شکست پر کھلاڑیوں اور ٹیم کے دیگرارکان کااحتساب ہوگا چیرمین پی سی بی

ورلڈ ٹی ٹوئنٹی میں پاکستان سے بھی بہتر ٹیمیں ہم سے پہلے ٹورنامنٹ سے باہر ہو ئیں، چیرمین پی سی بی۔ فوٹو: فائل

---

پاکستان کرکٹ بورڈ کے چیرمین نجم سیٹھی کا کہنا ہے کہ ہار جیت کھیل کا حصہ ہے تاہم ٹی ٹوئنٹی ورلڈ کپ میں شکست پر کھلاڑیوں اور ٹیم کے دیگر ارکان کا احتساب ہو گا۔

لاہور میں صحافیوں بات کرتے ہوئے نجم سیٹھی کا کہنا تھا کہ ٹیم مینجمنٹ سے ورلڈ ٹی ٹوئنٹی میں کارکردگی کی رپورٹ طلب کر لی ہے، کھلاڑیوں اور ٹیم کے دیگر ارکان کا احتساب ہو گا۔ ان کا کہنا تھا کہ ورلڈ ٹی ٹوئنٹی میں پاکستان سے بھی بہتر ٹیمیں ہم سے پہلے ٹورنامنٹ سے آؤٹ ہو گئیں، ہار جیت کھیل کا حصہ ہے لیکن کھلاڑیوں سے باز پرس ضرور ہو گی، ٹیم قوم کی توقعات پر پورا نہیں اتری جس پر شائقین کا احتجاج بجا ہے۔

نجم سیٹھی کا کہنا تھا کہ قومی ٹیم کے کپتان کو وطن واپسی پر فوری طور پر ملاقات کرنے کا کہا ہے تاکہ ویسٹ انڈیز کے خلاف عبرتناک شکست کی وجوہات کا پتہ لگا کر ان پر قابو پانے کی کوشش کی جا سکے۔

واضح رہے کہ گزشتہ روز قومی ٹیم کو ٹی ٹوئنٹی ورلڈ کپ کے اہم ترین میچ میں ویسٹ انڈیز کے ہاتھوں 84 رنز سے شکست کا سامنا کرنا پڑا تھا جس پر شائقین اور سابق کرکٹرز کی جانب سے قومی ٹیم کو شدید تنقید کا نشانا بنایا جارہا ہے۔