متنازع فلم پٹھان کے گانے ’بےشرم رنگ‘ نے ایک ہفتے میں 100ملین ویوز سمیٹ لیے

بالی ووڈ کے کنگ شاہ رخ خان کی نئی فلم پٹھان کے گانے ''بےشرم رنگ'' نے ایک ہفتے میں 100 ملین سے زائد ویوز حاصل کرلیے۔

بھارتی میڈیا کی رپورٹس کے مطابق یش راج فلمز کے بینر تلے ریلیز ہونے والی فلم پٹھان کے آفیشل تھیم سانگ ''بےشرم رنگ'' نے ایک ہفتے میں 100 ملین سے زائد ویوز حاصل کرلیے جبکہ بالی ووڈ اسٹار کنگ خان کی فلم اگلے سال جنوری کے آخر میں ریلیز کیلئے پیش کی جائے گی۔

فلم میں دیپیکا پڈوکون اور شاہ رخ خان مرکزی کردار ادا کررہے ہیں، دونوں نے سال 2014 میں فرح خان کی مووی ہیپی نیو ایئر میں ایک ساتھ کام کیا تھا، اس جوڑی کو فینز کی جانب سے بےحد پسند کیا گیا تھا۔

مزید پڑھیں: اکشے کمار کی ایک وڈیو نے سلمان خان کو جذباتی کردیا


پٹھان فلم میں شاہ رخ خان ایک خفیہ جاسوس کے کردار میں نظر آئیں گے اور دیپیکا انکی ہیروئن ہوں گی جبکہ جان ابراہم مخالف کردار ادا کریں گے۔

دوسری جانب پٹھان فلم ریلیز ہونے سے قبل ہی بھارت میں ہندو انتہاء پسند تنظیموں نے بائیکاٹ کرنے کی دھمکی دی ہے جبکہ گانے 'بےشرم رنگ' میں زعفرانی رنگ کے کپڑے پہننے پر اداکارہ کو شدید تنقید کا سامنا ہے۔

مزید پڑھیں: فلم'پٹھان' کا نام تبدیل کیا جائے، مدھیہ پردیش علماء بورڈ کا مطالبہ

ہندو انتہا پسندوں کا کہنا ہے کہ زعفرانی رنگ ہندو مذہب کی علامت ہے اور دیپیکا اس رنگ کو پہن کر گانے پر ڈانس کر رہی ہیں جو کہ ناقابل برداشت ہے۔ اس قسم کے گانوں میں زعفران جیسے مقدس رنگ کا استعمال قبول نہیں کیا جائے گا۔