پی سی بی میں تبدیلیوں کی آندھی چل پڑی

نجم سیٹھی کے آنے پر سی او او اور کئی ڈائریکٹرز کی کرسیاں ہلنے لگیں گی

Saleem Khaliq December 19, 2022

رمیز راجہ کی جانب سے ممکنہ برطرفی پر قانونی آپشنز کے استعمال کاامکان فوٹو : فائل

پی سی بی میں تبدیلیوں کی آندھی چل پڑی ہے تاہم کسی بھی وقت چیئرمین رمیز راجہ کو واپسی کا پروانہ تھما دیا جائے گا۔

سرپرست اعلیٰ وزیر اعظم شہباز شریف کو پی سی بی میں تبدیلی کے حوالے سے آئی پی سی سے سمری موصول ہو چکی، اس پر رواں ہفتے ہی دستخط کا امکان ہے، رمیز راجہ کی جگہ نجم سیٹھی چیئرمین بننے کیلیے تیار ہیں۔

ذرائع نے بتایا کہ نئے سربراہ جب عہدہ سنبھالیں گے تو کئی آفیشلز کی چھٹی یقینی ہے،طوفانی رفتار سے ترقی کی منزلیں طے کرنے والے سی او او سلمان نصیر کا ستارہ گردش میں آ سکتا ہے، البتہ سی ای او فیصل حسنین کو بچانے کیلیے ان کے کئی چاہنے والے سرگرم ہیں، دلچسپ بات یہ ہے کہ 2014 کا آئین اگر بحال ہوا تو اس میں چیف ایگزیکٹیو کا عہدہ ہی موجود نہیں ہے، ایسے میں فیصل کو سی او او بنایا جا سکتا ہے۔

ڈائریکٹر میڈیا سمیع الحسن برنی، ڈائریکٹر ہائی پرفارمنس ندیم خان، ڈائریکٹر انٹرنیشنل کرکٹ ذاکر خان سمیت کئی دیگر ٹاپ آفیشلز کی کرسیاں بھی ہلنے لگی ہیں،ندیم کے لیے بھی کئی سفارشیں سامنے آ چکی ہیں۔

ذرائع نے بتایا کہ کئی روز قبل ہی بورڈ کے بعض آفیشلز نے نجم سیٹھی سے رابطہ کر کے اپنی پوزیشنز بچانے کی کوشش شروع کردی تھی، چیف سلیکٹر محمد وسیم کا بھی عہدے پر مزید برقرار رہنا ممکن نہیں لگتا۔

دوسری جانب رمیز راجہ بھی عہدے سے ہٹائے جانے پر قانونی جنگ کا آپشن استعمال کرنے کا سوچ رہے ہیں، فوری کوشش اسٹے آرڈر لینے کی ہو گی،البتہ ممکنہ نئے حکام بھی اس حوالے سے تیار نظر آتے ہیں۔