کراچی میں سردی کی شدت بڑھنے کا امکان

کراچی میں 22 تا 23 دسمبر خنک ہوائیں چلنے کے سبب سردی کی شدت میں اضافہ ہوسکتا ہے، پیر کو کم سے کم پارہ 12.8 ڈگری ریکارڈ ہوا۔

چیف میٹرولوجسٹ محکمہ موسمیات سردار سرفراز کے مطابق 20 دسمبر کے بعد بلوچستان کی شمال مشرقی سمت کی ہوائیں چلنے کے سبب شہر کا موسم قدرے خنک ہونا شروع ہوجائے گا جس کی وجہ سے ٹھنڈ بڑھ سکتی ہے۔


ان کا کہنا ہے کہ 22 اور 23 دسمبر کے درمیان حالیہ دنوں کے مقابلے میں زیادہ سردی محسوس کی جاسکتی ہے، جمعرات اور جمعہ کو شہر کا کم سے کم درجہ حرارت 10 ڈگری سینٹی گریڈ تک گرسکتا ہے جبکہ ایک امکان یہ بھی ہے کہ مذکورہ دورانیے میں پارہ سنگل ڈیجیٹ ریکارڈ ہو۔

محکمہ موسمیات کے ارلی وارننگ سینٹر کی پیش گوئی کے مطابق بدھ سے شہر میں سمندر کی جنوب مغربی ہوائیں غیر فعال ہونے جبکہ بلوچستان کی شمال مشرقی ہواؤں کے اثرانداز ہونے کا امکان ہے، صوبے کے بیشتر اضلاع میں موسم خشک اور خنک رہنے جبکہ بالائی سندھ میں صبح کے وقت دھند چھاسکتی ہے۔