پاکستانی عمرہ زائرین جدہ ایئرپورٹ پر دو دن سے محصور کھانا اور پانی بھی ختم
جدہ ایئرپورٹ پر 2 دن سے بیٹھے مسافروں کو انتظامیہ کی جانب سے کوئی جواب نہیں آرہا نہ کھانے کو کچھ دیا جارہا ہے، زائرین
سعودی ائیر لائن کی پرواز کی منسوخ ہونے سے جدہ ایئرپورٹ پر پاکستانی عمرہ زائرین کی بڑی تعداد پھنس گئی۔
ایکسپریس نیوز کے مطابق سعودی ائیر لائن ایس وی 738 نے 350 عمرہ زائرین کو 3 جنوری کو پاکستان لیکر آنا تھا تاہم خراب موسم کے باعث ایئرلائن حکام نے پرواز منسوخ کردی۔
ایئرپورٹ پر محصور پاکستانی عمرہ زائرین نے بتایا کہ دو دن سے جدہ ائیر پورٹ پر پھنسے ہوئے ہیں، کوئی پوچھنے والا نہیں ہے، بیشتر مسافروں کے پاس کھانے پینے کو بھی کچھ نہیں ہے، حکام نے تاحال نہیں بتایا کہ پرواز کب روانہ ہوگی۔
زائرین نے بتایا کہ انتظامیہ کے عدم تعاون کیوجہ سے بچوں اور بوڑھوں کو شدید مشکلات کا سامنا کرنا پڑ رہا ہے، پاکستانی حکام فوری واپسی کے لیے اقدامات کرے۔