منشیات کی اسمگلنگ پاکستانی برآمدات کے لیے بڑا خطرہ

ڈرگ انسپیکشن نہ کریں تو سیکڑوں ایکسپورٹرز بلیک لسٹ ہوجائیں، بریگیڈیئر ابوذر

Business Reporter April 06, 2014

رواں سال ون کسٹمز کلیئرنس نظام ختم، 2016تک اسکینرز لگ جائینگے، عبدالماجد، جاوید بلوانی ودیگر۔ فوٹو: فائل

مس ڈیکلریشن اور جعلی فارم ''ای'' کے ذریعے برآمدی کنسائنمنٹس میں منشیات کی اسمگلنگ بڑھ گئی ہے جس کا تدارک وقت کی اہم ضرورت ہے۔

برآمدی کارگو کی ڈرگ انسپیکشن میں اینٹی نارکوٹکس فورس کا کردار نہ صرف ملک وقوم بلکہ برآمدکنندگان کے لیے بھی ناگزیرہے، اگر اے این ایف ڈرگ انسپیکشن روک دے تو یورپ وامریکا سمیت دنیا کے دیگر تمام ممالک میں سیکڑوں برآمدکنندگان بلیک لسٹ ہوجائیں گے۔ یہ بات ڈائریکٹر جنرل ریجنل ڈائریکٹریٹ اینٹی نارکوٹکس فورس بریگیڈیئر ابوزر نے ہفتہ کو پاکستان ہوزری مینوفیکچررز اینڈ ایکسپورٹرز ایسوسی ایشن (پی ایچ ایم اے) میں ویلیوایڈڈ ٹیکسٹائل ایسوسی ایشنز کے نمائندوں اور برآمدکنندگان کے اجلاس سے خطاب کے دوران کہی، اجلاس میں پی ایچ ایم اے اور اے این ایف کی جانب سے اے این ایف انسپیکشن سے متعلق پریزنٹیشنز دی گئیں۔

بریگیڈئرابوزر نے کہا کہ اے این ایف مجموعی سالانہ برآمدات میں سے محض 2.2 فیصدکا اطلاع ملنے پر معائنہ کرتی ہے، سال2013 میں اے این ایف نے منشیات اسمگلنگ کے 10 کیس پکڑے جن میںہیروئن اور چرس سمیت بھاری مقدار میں منشیات پکڑی گئی تھی، رواں سال اب تک اے این ایف نے منشیات کی اسمگلنگ کے 2 کیس پکڑے ہیں۔انہوں نے برآمدکنندگان سے کہا کہ وہ اس ضمن میں محتاط رہیں کیونکہ اسمگلرز ان کے پورے نچلے عملے کو خریدکر برآمدی کارگو کے ذریعے منشیات اسمگل کرنے کی کوشش کر سکتے ہیں، برآمدکنندگان کو اپنا اصلی فارم ''ای'' فروخت نہیں کرنا چاہیے جبکہ پورٹ آپریٹرز کی جانب سے ون ونڈو سروس بھی مہیا نہیں کی جانی چاہیے۔

انہوں نے کہا کہ برآمدکنندگان کو اے این ایف انسپیکشن کے دوران اپنے کلیئرنگ ایجنٹ کو لازمی طور پر بھیجنا چاہیے۔ محکمہ کسٹمز کے ڈائریکٹرریفارمزاینڈ آٹومیشن عبدالماجد یوسفانی نے بتایا کہ محکمہ کسٹمز میں رواں سال کے اختتام تک ون کسٹمز کلیئرنس سسٹم ختم کردیا جائیگا جبکہ جاپان نے انسدادمنشیات کے3 اسکینرز فراہم کرنے کا عندیہ دیا ہے جو 2016 میں پورٹ قاسم، کراچی ایسٹ وہارف اور ویسٹ وہارف پر لگائے جائیں گے۔پی ایچ ایم اے کے چیف کوآرڈینیٹر جاوید بلوانی نے انسپیکشن سے برآمدکنندگان کو نقصانات کی تفصیل بتاتے ہوئے تجویز پیش کی کہ کارگو کی انسپیکشن کیلیے خصوصی اسکینرز لگوائے جائیں۔قاسم انٹرنیشنل کنٹینرٹرمینل کے نمائندے محمد رضوان نے بھی خطاب کیا۔