بیرون ملک نئے ٹریڈ افسران کی تعیناتی کیلیے سفارشات تیار

بیرون ملک نئے ٹریڈ افسران کی تعیناتی کیلیے وزیر اعظم شہباز شریف کی قائم کردہ کمیٹی نے سفارشات تیار کر لیں۔

وزارت تجارت ذرائع کے مطابق سمندر پار پاکستانیوں کا کوٹہ 20 سے کم کر کے 10 فیصد کرنے اور کامرس اینڈ ٹریڈ کے سوا باقی گروپس کے افسران کی تعیناتی محدود کرنے کی سفارش کی گئی۔

کمیٹی نے گریڈ 18 میں کامرس اینڈ ٹریڈ گروپ کیلیے 60 فیصد کوٹہ مختص کرنے، گریڈ 19 میں کامرس اینڈ ٹریڈ گروپ کیلیے 50 فیصد کوٹہ رکھنے، گریڈ 20 میں کامرس اینڈ ٹریڈ گروپ کیلیے 40 فیصد کوٹہ مختص کرنے کی سفارش کر دی۔


ذرائع کے مطابق تحریری و دیگر ٹیسٹ کیلیے سیلبس کی ذمہ داری وزارت تجارت کو دینے کی سفارش بھی کی گئی ہے۔ کمیٹی اپنی یہ سفارشات جلد منظوری کیلیے وزیر اعظم کو پیش کرے گی۔ نئے ٹریڈ افسران کی تعیناتی کا عمل وزیر اعظم کی منظوری کے بعد شروع ہوگا۔

وزیر اعظم نے سابق سیکرٹری ناصر کھوسہ کی سربراہی میں 8 رکنی کمیٹی قائم کی ہے۔