19 زبانوں میں گانے والی ایوارڈ یافتہ بھارتی گلوکارہ مردہ حالت میں پائی گئیں

1971 میں گلوکاری کا آغاز کرنے والی گلوکارہ نے 3 نیشنل ایوارڈ جیتے اور 10 ہزار سے زائد گیت گائے

ویب ڈیسک February 05, 2023

بھارتی گلوکارہ اپنے کمرے میں مردہ حالت میں پائی گئیں، فوٹو: فائل

بھارت میں 80 کی دہائی کی مقبول گلوکارہ وانی جےرام اپنے گھر میں مردہ حالت میں پائی گئیں۔

بھارتی میڈیا کے مطابق گلوکارہ کے گھر کام کرنے والی ماسی نے صبح بار بار گھنٹی بجانے کے باوجود دروازی نہ کھولنے پر وانی جے رام کی بہن کو بلایا جن کے پاس گھر کی متبادل چابی بھی تھی۔

ڈپلی کیٹ چابی کی مدد سے دروازہ کھول کر اہل خانہ جب گھر میں داخل ہوئے تھے ماضی کی مقبول گلوکارہ فرش پر گری ہوئی تھیں اور ان کے سر سے خون بہہ رہا تھا۔

گلوکارہ وانی جے رام کو فوری طور پر اسپتال لے جایا گیا جہاں ان کی موت کی تصدیق کردی گئی۔ ابھی یہ واضح نہیں کہ گلوکارہ نے خودکشی کی یا وہ حادثاتی طور پر گر کر ہلاک ہوگئیں۔

پولیس نے مقدمہ درج کرکے تفتیش شروع کر دی۔لاش کا پوسٹ مارٹم کیا جا رہا ہے۔

واضح رہے 19 زبانوں میں گیت گانے والی گلوکارہ وانی جے رام نے 1971 میں کیریئر کا آغاز کیا اور تین بار بھارت کا نیشنل فلم ایوارڈ بھی حاصل کیا۔ انھوں نے تقریباً 10 ہزار سے زائد گیت گائے تاہم کافی عرصے سے گلوکاری کو خیرباد کہہ دیا تھا۔