قومی سلیکشن کمیٹی کیلیے پیش کش ہوئی تو ضرور سوچوں گا انضمام

سابق ٹیسٹ کپتان اور پشاور زلمی کے صدر انضمام الحق نے کہا ہے کہ اگر قومی سلیکشن کمیٹی میں دوبارہ موقع ملا تو ضرور سوچیں گے۔ بابراعظم اس وقت دنیا کا بہترین بیٹر ہے، وقت گزر نے کے ساتھ اس کی صلاحیتں مزید نکھر کر سامنے آئیں گی۔

نیشنل اسٹیڈیم کراچی میں میڈیا سے گفتگو کرتے ہوئے اپنے دور کے عظیم بیٹر اور سابق چیف سلیکٹر نے کہا کہ پی ایس ایل سے کافی اچھے کھلاڑی ملے ہیں۔ہمارے پلیئرز کو انٹرنیشنل کھلاڑیوں سے سیکھنے کو ملتا ہے۔کھلاڑیوں کو نفسیاتی طور پر کافی فرق پڑا ہے۔


انہوں نے کہا کہ بابر اعظم اس وقت دنیا کا بہترین کھلاڑی ہے،تاہم سیکھنے کا عمل زندگی بھر جاری رہتا ہے۔ بابراعظم دنیا کی کسی بھی ٹیم سے آؤٹ نہیں ہورہا،بابر اعظم ہر فارمیٹ کا نمبر ون کھلاڑی ہے۔ بابراعظم کی پرفارمنس گزرتے وقت کیساتھ بہتر ہوتی جارہی ہے۔بابر اعظم کیساتھ کام کرنا میرے لیے اچھا تجربہ رہےگا۔

انضمام الحق کا کہنا تھا کہ پشاور زلمی کے ساتھ رہ کر کوشش کروں گا کہ ابھرتے ہوئے نوجوان کھلاڑیوں کے ساتھ کام کروں۔ میں ذمہ داریوں سے پوری طرح لطف اندوز ہو رہا ہوں۔ہمارے دور کی کرکٹ الگ اور مختلف تھی۔ دل کرتا ہےکہ ہمارے وقت میں بھی لیگ ہوتی۔ہمیں ایسے کھلاڑی درکار ہیں جو جدید کرکٹ کھیل سکیں۔ کرکٹ میں جدت آتی جارہی ہے جس میں تیز کرکٹ کھیلنے کی ضرورت ہے۔اب سوچ بدلنے کی ضرورت ہے تاکہ موجودہ کرکٹ جدید انداز سے کھیلی جاسکے۔