میرا نکاح فلموں کے سین کی طرح اچانک ہوا ہے شاداب خان
ثقلین مشتاق کے ساتھ اچھا تعلق ہے، وہ بطور ایک کوچ مجھے ڈانٹ بھی دیتے ہیں، کرکٹر
قومی کرکٹ ٹیم کے نائب کپتان اور لیگ اسپنر شاداب خان نے کہا ہے میرے نکاح میں سب کچھ بہت جلدی ہوا جس طرح فلموں والا سین ہوتا ہے۔
سوشل میڈیا پر اپنے مداحوں کے ساتھ گفتگو میں کرکٹر کا کہنا تھا کہ میرے نکاح کی تقریب اچانک ہوئی ہے اور سچ پوچھیں تو مجھے خود بھی پتہ نہیں چلا۔
اس سوال کے جواب میں کہ ان کے نکاح کے اعلان سے ہزاروں لوگوں کے دل ٹوٹ گئے ہیں شاداب خان نے ہنستے ہوئے کہا کہ جن کے دل کل ٹوٹنے تھے وہ آج ٹوٹ گئے۔
شاداب خان کا کہنا تھا کہ ثقلین مشتاق کے ساتھ اچھا تعلق ہے، وہ بطور ایک کوچ مجھے ڈانٹ بھی دیتے ہیں لیکن بطور سسر ابھی یہ معاملہ شروع نہیں ہوا ہے۔
انہوں نے بتایا کہ حارث اور میرا شادی کا کوئی پلان نہیں تھا سب کچھ اچانک ہوا ہے، حارث انجرڈ ہوئے تو انہوں نے شادی کا پلان بنالیا۔
قومی کرکٹر کا کہنا تھا کہ میں بھی آسٹریلیا جانے والا تھا لیکن انجری کے باعث مجھے وقت مل گیا اور میں نے سوچا کہ نکاح کرلیتا ہوں۔
واضح رہے کہ شاداب خان پاکستان سابق ٹیسٹ کرکٹر اور پاکستان کرکٹ ٹیم کے سابق ہیڈ کوچ ثقلین مشتاق کی صاحبزادی سے گزشتہ ماہ نکاح ہوا تھا۔ چند روز قبل شاداب خان کے گھر مہندی کی تقریب ہوئی جس کی تصاویر اور ویڈیوز فاسٹ بولر حسن علی کی اہلیہ سمیعہ نے سوشل میڈیا پر شیئر کیں۔