پی ایس ایل8 کی ٹرافی جیت کر شاداب خان کو شادی کا تحفہ دیں گے حسن علی
اگر شاداب خان کو پاکستان کرکٹ ٹیم کی قیادت کا موقع ملا تو وہ وہ کپتان ضرور بنیں گے، بولر
ایچ بی ایل پی ایس ایل 8 میں اسلام آباد کی نمائندگی کرنے والے پاکستان کرکٹ ٹیم کے فاسٹ بولر حسن علی نے کہا ہے کہ پی ایس ایل کیوجہ سے ردہم میں آنے کا بہترین موقع ملے ہوگا، پی ایس ایل 8 جیت کر شاداب خان کو شادی کا سب سے بڑا تحفہ دیں گے۔
ان خیالات کا اظہار انہوں نے نیشنل اسٹیدیم کراچی میں میڈیا سے گفتگو کرتے ہوئے کیا۔ حسن علی نے کہا کہ یہ درست ہے کہ میری کارکردگی میں تسلسل برقرار نہیں رہا اور اونچ نیچ آتی رہی ہے ،پی ایس ایل میں اپنی کارکردگی میں بہتری لانے کا نادر اور بہترین موقع میسر آئے گا، تاہم میری ذاتی زندگی کے حوالے سے کسی کچھ بھی کہنے کا حق نہیں، جو مجھ پر تنقید کرتے ہیں، وہ کبھی مجھے نیٹ پر بھی آکر مجھے کھیلتا دیکھیں۔
انہوں نے کہا کہ 'میں ایک کرکٹر ہوں اور کوئی ہنر مجھے نہیں آتا، دنیا جانتی ہے کہ پی ایس ایل نے دنیا میں اپنا ایک بلند مقام بنالیا ہے، لیگ کی بدولت پاکستان کرکٹ ٹیم کو بھی متعدد اچھے کھلاڑی میسر آئے ہیں، پی ایس ایل 8 کے لیے اسلام آباد یونائیٹیڈ کی ٹیم بہت ہی متوازن اور مناسب ہے جس میں بہترین کھلاڑیوں کا شاندار امتزاج ہے، بولنگ اور بیٹنگ کے ساتھ فیلڈنگ میں ہمارا معیار کافی بہتر ہے جبکہ لیگ میں اچھے نتائج کی توقع ہے۔
حسن علی نے اپنے روٹی گروپ کے ساتھی اور ممتاز آل راونڈر شاداب خان کے حوالے سے سوال کے جواب میں کہا کہ مجھے اپنے دوست کی شادی کی بہت خوشی ہے، ان کی شادی میں میرے اہل خانہ بھی بہت مصروف رہے۔
انہوں نے مزید کہا کہ پی ایس ایل 8 کا ٹائٹل جیت کر شاداب خان کو شادی کا سب سے بڑا تحفہ دیں گے، اگر شاداب خان کو پاکستان کرکٹ ٹیم کا حصہ بننے کے بعد قیادت کا موقع ملا تو وہ وہ کپتان ضرور بنیں گے۔