رمیز راجا نے نام لیے بغیر کراچی کنگز کی ناکامیوں کا ذمہ دار انتظامیہ کو ٹھہرادیا

کنگز کو رواں سیزن میں لگاتار ابتدائی تین میچوں میں شکست، آج لاہور سے مقابلہ کریگی (فوٹو: ایکسپریس ویب)

---

سابق چیئرمین پاکستان کرکٹ بورڈ اور کمنٹیٹر رمیز راجا نے نام لیے بغیر کراچی کنگز کی ایونٹ میں مسلسل ناکامیوں پر انتظامیہ اور سرپرستوں کو ذمہ دار ٹھہرادیا۔

پاکستان سپر لیگ (پی ایس ایل) کے آٹھویں سیزن میں بھی کراچی کنگز ابھی تک فتح کا دروازہ نہیں کھول سکی ہے، گزشتہ ایڈیشن میں کنگز کی ٹیم محض ایک لیگ میچ جیت سکی تھی جبکہ رواں سیزن میں لگاتار ابتدائی تین میچوں میں شکست کا منہ دیکھ چکی ہے۔

رمیز راجا کا خیال ہے کہ کراچی کنگز کو اپنی قسمت بدلنے کیلئے انتظامیہ اور سرپرستوں کو تبدیل کرنے کی ضرورت ہے تاکہ وہ ٹاپ تھری میں اپنے سیزن کا اختتام کرسکیں۔

مزید پڑھیں: رمیز راجا کو واپس اپنی جگہ پر آجانا چاہیے، وسیم اکرم کا طنز

کراچی کنگز کے ساتھ وسیم اکرم پی ایس ایل 4 سے صدر اور باؤلنگ مینٹور کے طور پر خدمات سرانجام دے رہے ہیں لیکن فرنچائز گزشتہ دو سیزن سے کوئی خاص پرفارمنس دیکھانے میں کامیاب نہیں ہوسکی ہے، رمیز کا کہنا تھا کہ فرنچائز کی جانب سے کم تبدیلیاں اور اعتدال پسندی انہیں نقصان پہنچا رہی ہے۔

رمیز راجا نے مزید کہا کہ اگر فرنچائز نے ہارنے کا سلسلہ جاری رکھا تو کراچی کنگز کے شائقین بھی اپنا صبر کھودیں گے، ہوم گراؤنڈ پر ٹیم کے ہارنے سے شائقین ناراض ہوتے ہیں۔

مزید پڑھیں: کوئٹہ گلیڈی ایٹرز نے کراچی کنگز کو 6 رنز سے شکست دے دی

قبل ازیں گزشتہ ماہ وسیم اکرم نے کرکٹ پاکستان کو دیئے گئے خصوصی انٹرویو میں سابق چیئرمین پی سی بی رمیز راجا کو شدید تنقید کا نشانہ بنایا تھا۔ انکا کہنا تھا کہ وہ چھ دن کیلئے آئے تھے اب چلے گئے انہیں واپس اپنی جگہ پر آجانا چاہیے، نجم سیٹھی تجربہ کار ہیں وہ معاملات ڈیل کرنا جانتے ہیں۔

واضح رہے کہ کراچی کنگز کی ٹیم آج رویتی حریف لاہور قلندرز کے خلاف میدان میں اترے گی۔